Ngi dei ban nang kumno ban jied paralok naduh na skul: Dr. J. Ïawphniaw

Nongstoiñ, Jymmang 13: Haba ai mynsiem sha ki samla pule bad ki khynnah skul jong ka Assembly of God Secondary School Siejlieh, u Dr Juristman Ïawphniaw MDC jong ka Nongstoiñ Constituency, u la ban jur ba hapdeng ka jingbeh ïa ka jingnang jingstad bad ka thong ban poi sha ka kyrdan bad burom, kaba kongsan ka long ban nang ban jied ïa ki paralok naduh na skul.
Ïa kane u la pynpaw ha ka sngi ba ar jong ka taiew ha ka jingpynkup burom jong ka skul Assembly of God Secondary Schools Siejlieh ïa ki khynnah skul jong ka kiba la wan shakhmat ha ki jingpule lyngba ka Exam SSLC mynta u snem.
U kongsan haba ai jingkren u la kyntu kynpham ïa ki khynnah skul, da kaba u la ong ba ka jingjied ïa ki paralok ka dei kawei na kiba kongsan ha ka jingim ki briew, kumta dei ban tip kumno bad no ban ïa long paralok ïano ban kiar.
Nangta haba thmu ïa kano kano kaba bha, buh shwa ïa U Blei hakhmat ha ki jingduwai namar U Blei u long u ba kloi ban shahskhor bad sngap ïa ki jingduwai bad u ai ruh ka jubab sha kiba pan da ka jingsngewrit.
Shuh shuh u la ai khublei kitbok kit rwiang ïa ki samla pule ba la paw bha bad kyntu ruh ïa kiwei pat, ba kin nang ban pyndonkam ïa ka por bad ban trei shitom trei minot ban poi sha ka thong jong ka jingjop ha ki jingpule jong ki ha ki kyrdan bapher bapher.
Kiwei kiba la don lang ha ka jingïalang pynkup burom, ki long I kong Ela Begum Laskar Joint Director of School Education & Literacy kum I symbud kongsan, u Pastor Aibor Thabah Headmaster ka Eagle’s Wings Academy Siejlieh, u Elder R.Tongkhar, ki kmie ki kpa bad kiwei kiwei.
Ka jingpynkup burom ka long kum ka dak ka jingkmen namar baroh kiba la ïaleh ïa ka Examination SSLC ki la pass lut 100 na ka 100, kynthup ïa ki 10 ngut kiba la ïoh 1st Division, 15 ngut kiba Second Division bad 5 ngut ha ka Third Division.
La pynkup burom ruh ïa kiwei pat ki khynnah skul kiba la wan shakhmat ha kiwei pat ki bynta, kum ka heprit Kanwanwad Thyrniang, kaba la wanrah burom ïa ka skul lyngba ka Science Exhibition.Kumjuh ruh ïa u babu Khampher Puweiñ u ba dei uwei na ki radbah jong ka skul u ba ju pynshlur ïa ki khynnah bad kyrshan ha ka Subject Science bad kiwei kiwei.
Ïa katei ka jingïalang la pynlong ha phyllaw ka skul bad la pynïaid ïa katei ka jingïalang da u Dr Rev M.S Nongrem Headmaster ka Assembly of God Secondary Schools Siejlieh.