Hadien 3 kynta ka jingïatai bad ka Assam, seisoh ka jingïakren pyntip u Symbud Myntri Rangbah

Nongpoh, Nailar 22: Hadien ka jingïakhih kaba la neh 3 sngi eiei naka jingkhang ïaki surok da ki nongñiah kali na Assam kiba la khanglad ïaki kali Meghalaya ban leit sha Assam bad kumjuh ruh ka jingkhang mar kylliang ka seng ki nongñiah kali naka jylla Meghalaya ban khanglad ïaki kali ba wan na Assam, kaba mih naka huri hura ka jingïaid rally ka KSU ha nongbah Shillong haka 19 tarik Nailar, ka High Level Meeting hapdeng ka jylla Meghalaya bad Assam kala long mynta ka sngi ha Koinadhara State Guest House ha Khanapara, Guwahati ban ïakren halor ka jinglong jingman bad kumno ban weng ïaki jingeh kiba mih ha khappud ka jylla Meghalaya bad Assam.
Kane ka jinglong jingman ka la ktah bha ïa ka jingïaid jingïeng jong ki paidbah, ki nongñiah kali kamai bad ka khaïi pateng hapdeng ki ar jylla.
Na ka liang ka jylla Meghalaya, u Bah Sniawbhalang Dhar, Symbud Myntri Rangbah ka jylla, u la ïalam ïa ka kynhun ban mihkhmat ïa ka jylla, katba na Assam la mihkhmat da u Atul Bora, Myntri ka Sorkar Assam haka jingdonlang ki Chief Secretary jong baroh ar jylla bad kiwei ki heh sahep sorkar ka Meghalaya bad Assam.
Ki jingïakren ki long ban wad ïa ka lad kaba lah ban pynjem ïa ka jingïakynad bad ban wanrah biang ïa ka jingïaid beit jong ki kali bad ki paidbah hapdeng Meghalaya bad Assam.
Hadien kumba 3 kynta eiei ka jingïatai ñia bad ka jingïakren halor ka kynrum kynram bad ka jingkajia kaba la mih naka jingïaid rally jong ka Khasi Student Union haka 19 tarik mynta u bnai, ka jingïakren hapdeng ki myntri sorkar bad ki ophisar ka Meghalaya bad Assam kala long kaba seisoh ban weng ïaki jingeh kaba la mih hapdeng ki ar jylla khamtam ha khappud, naka daw ka jingkhang lynti ïaka rung ka mih ki paidbah.
Haba pyntip ïa kane u Bah Sniawbhalang Dhar u la ai khublei ïa u Myntri Rangbah ka Meghalaya bad Assam kiba la shimkhia ïa kane ka mat ba kongsan namar ka jingmih ki jingjia bym sngewtynnad ha kine ki 2 ne 3 sngi kiba la leit bad ngim kwah ba ki briew jong ngi haka jylla kin mad jingeh naka jingduna ka bam ka dih bad kiwei kiwei ki jingdonkam, kumta kum u Symbud Myntri Rangbah ka jylla haka jingsynran lang u Chief Secretary lem bad ka kynhun ki heh ophisar ka jylla bad Ri-Bhoi District mynta ka sngi kila hiar sha Khanapara ban ïakren pynbeit ïa kane ka kam.
U la ong ruh ba hadien kumba 3 kynta ka jingïataiñia bad ka jingpynbeit bad ka sorkar Assam, haba kut ka jingïakren kala long kaba seisoh ban wanrah ïaka suk ka saiñ kumba ju long, namar lada kane ka jingïakhih kan dang bteng kan shem jingeh ïaka jylla ban ioh ka bam ka dih bad ka umphñiang.
Shuh shuh la ong ruh ba ka sorkar kan pyrshang ban pyrkhing noh nangne shakhmat ba kam dei shuh ban jia, bad naka liang ki pulit mynta ki dang pyndep la ka kamram ban kem ïa kiba donkti bad buh ruh ka jingkyrpad sha ki paidbah ka jylla bad kumjuh ruh ki sengbhalang ba lada don kano kano ka ishu wan sha ka sorkar, ym ban leh shitkhlieh namar ka sorkar ka plie ïaka jingkhang bad khmih lynti ba kane ka huri hura baroh kan kut noh bad hadien katto katne sngi ka leit ka wan kan long biang kumjuh, u la pynthikna.
Ka rai jong ka jingïalang: Haba ïadei bad ka jingïakren ha kane ka sngi, naka liang u Bah Sniawbha u la ong ba ka jingjia haka 19 tarik ka long ka jingjia ka bym poi pyrkhat bad u la pyntip ruh sah ka sorkar Assam ba ka sorkar Meghalaya kala shimkhia ïa katei ka kam bad kem ruh ïaki nongïalam ka KSU ba kynthup ïa u President, Vice-President bad General Secretary bad pynngat ruh haka MMPO Act bad ka sorkar Meghalaya kala dep ban register haduh 15 tylli ki ejahar haba ïadei bad ka jingjia ha ka 19 tarik bad la ithuh ruh kumba 5 ngut ki briew kiba la kah durkhmat kiba la dusmon ïaki kali Assam.
Shuh shuh u la pyntip ruh ba ka sorkar jylla kala thaw ruh ïaka Special Investigation Team ban tohkit halor katei ka jingjia khamtam ka jingshah dusmon ki kali Assam, bad haduh mynta ki don kumba 3770 tylli ki kali Assam kiba la pynpoi suk na Meghalaya sha Assam bad kino kino ki kali kiba dang sahkut, yn synran ïaki bad pynpoi hapoh 48 kynta sha Assam.
La rai ruh ban thaw ïaka Permanent District-Level Joint Committees ba kynthup ïaki Deputy Commissioner ka Ri-Bhoi bad Kamrup Metropolitan ryngkat ki pulit ophisar naki ar district ban pynthikna ba kan nym don kano kano ka jingkajia ha khappud.
La rai ruh ban thaw ïaka Joint Committee on tourist transport, ba kynthup ïaki Commissioner ne Secretary Level ka tnad Transport jong ki ar jylla ryngkat ki nongmihkhmat naki nongñiah kali kamai ban pynthikna ba ki nongjngohkai pyrthei kin nym don kano kano ka jingshah pynthud bad naka liang ka sorkar Meghalaya bad Assam kin shim ruh ka jingkitkhlieh ban pynthikna ïaka jingshngaiñ jong ki nongleit nongwan kynthup ïaka bynta jong ka Barack Valley naka bynta ki paidbah na Meghalaya kiba ïaid lyngba ka Assam.
Khatduh khatwai ka sorkar Meghalaya kala shim ruh ka jingkitkhlieh naka bynta ka jingshngaiñ jong baroh ki nongjngohkai pyrthei kynthup na Assam bad kiwei kiwei ki jylla kiba wan ban sah ha Meghalaya ban nym don kano kano ka jingshah pynthud.