Hadien 27 tylli ki snem bad jingangnud plie u Myntri Rangbah ïa ka Patharkhmah Civil Sub-Division

Nongpoh, Nohprah 02: Hapdeng ka jingkmen ba khraw bad ka jingangnud kaba la slem jong ki paidbah ka thaiñ Patharkhmah ban ioh noh ïaka Civil Sub-Division khamtam ban pynsuk bad pynjan ïaki paidbah ha kaba ïadei bad ki ophis treikam jong ka sorkar, katei ka jingangnud jong ki paidbah kala urlong noh mynta ka sngi hadien ba u Myntri Rangbah ka jylla u Conrad K Sangma mynta ka sngi u la leit ban plie paidbah syndon ïa Patharkhmah Civil Sub-Division haka jingïalang ba shongkun kaba la long ha madan ïalehkai ka shnong Patharkhmah.
Ha katei ka jingplie ïaka Civil Sub-Division la wan ruh ban shim bynta da u Macmilan Byrsat MLA ka Nongstoiñ, u Bah Sosthenes Sohtun MLA ka Jirang, Bah Victor Ranee MDC ka Jirang, u Arpit Upadhyay Deputy Commsioner ka Ri-Bhoi District, ki heh ophisar naka district, ki nongïalam shnong, ki nongïalam sengbhalang ryngkat bad ki hajar ngut ki paidbah kiba la wan ban sakhi lang ha katei ka sngi.
Kum ban shu pynpaw ka Patharkhmah Administrative Unit kala don mynta kumba 27 snem naduh bala thaw ïaka ha u snem 1995 bad ka Civil Sub Division ka dei ka jingangnud bala slem jong ki paidbah lah bun phew snem kaba la ju dawa ruh naduh ki por ba mynshuwa khlem da lah ban pynurlong, hynrei dei mynta ka kynti hapoh ka jingïalam jong u Bah Sosthenes Sohtun kum u MLA la lah ban pynurlong bad ban plie paidbah syndon ïaka ophis treikam jong u Sub Divisional Officer (Civil) ha katei ka sngi.
Ha katei ka sngi la pynkhamti ruh ïa u Bah BJ Kharshandi u ba dei u ADC ka Ri-Bhoi kum u SDO ba nyngkong jong katei ka Civil Sub Division ha Patharkhmah bad kumba 110 tylli ki shnong ka thaiñ Patharkhmah kin shah kynthup hapoh ka Patharkhmah Civil Sub Division.
Haba kren ha katei ka sngi naka liang u Bah Sosthenes Sohtun kum u MLA ka thaiñ da ka jingkmen kaba khraw u la ai ka jingkhublei ba kyrpang ïaka sorkar MDA hapoh ka jingïalam jong u Conrad K Sangma kum u myntri Rangbah, kaba la sngap bad shah skhor ïaka jingud bad ka jingdonkam jong ki paidbah ka thaiñ ban kyntiew kyrdan noh ïaka Administrative unit sha ka Civil Sub Division kaba long shisha ka jingkyrkhu ïaki paidbah ka thaiñ namar kum u MLA um shym la shongthaid ban buddien bad pynurlong ïaka Civil Sub Division.
U la ong ruh nalor ka Civil Sub Division kumba long haduh mynta ka Jirang Constituency kala ioh shibun ki kam pynroi kaba la kot palat ïaka 500 klur naduh ki surok, ki jaka pule, ki jaka sumar bad kiwei kiwei kaba la wanrah ruh shibun ki jingkylla ha katei ka thaiñ kaba ki paidbah kim pat ju ioh mad haki snem bala leit noh, watla ki don shibun ki nongkynthoh naka liang u MLA u la kyrpad ïaki paidbah ba kin ïatylli ban don ka jingïatreilang khamtam ban dang bteng shuh shuh shibun ki kam pynroi ba dang sahteng ba ki paidbah ki dang donkam ha katei ka thaiñ.
U Conrad K Sangma kum u kongsan haba kren ha katei ka sngi u la pynpaw ba ka Civil Sub Division ha Patharkhmah ka dei ka thong jong ka sorkar ban pynsuk ïaki paidbah haki kam ki jam ban pynïajan bad ka sorkar bad ïa ki jingangnud baroh la lah ban pynurlong da ka sorkar MDA kaba don ka thong ban kyntiew ïaka dong ka thaiñ kumba ka Patharkhmah Administrative Unit kala don hok ban ioh noh ïaka Civil Sub Division.
Halor ka jingplie ïaka Civil Sub Division ha Patharkhmah naka liang u Myntri Rangbah u la ai ka jingïaroh ïa u Bah Sosthenes Sohtun MLA u ba la shimkhia ban buddien ïa katei ka kam namar u dei u shisha u MLA u ba don ka jingkitkhlieh naka bynta ki paidbah ka Jirang Constituency kaba la ioh mad shibun ki jingkyrkhu ha kane ka kynti ba mynta.
U la ong ruh ba ka sorkar MDA tang hapoh 5 snem kala lah ban pynurlong shibun ki Civil Sub Division, ki District bad kumjuh ruh ki C&RD Block haka jylla nalor kiwei kiwei ki kam pynroi ba kum ka sorkar ka don ïaka thong ban peit ïaka jingdonkam jong ki paidbah.