Jowai, Nohprah 02 : U Myntri ka C&RD jong ka jylla u Hamletson Dohling ha ryngkat u MLA ka thaiñ uba dei ruh u myntri ka kam pohïing u ma Lahkmen Rymbui, u S. C. Sadhu, IAS, Director, C&RD, u bah B. S. Sohliya, IAS, DC Jowai bad kiwei de ki ophisar sorkar jong ka Distrcit bad kumjuh na ka Sub-Divisional Officers mynta ka sngi kila wan ban plie ïa u mawnongrim ban tei ïa ka Block Complex ne ka ïing thymmai jong ka Amlarem C&RD Block West Jaiñtia Hills District.
La ïathuh ba ïa kane ka Block Complex la aiti ban pyntrei da u Contractors uba dei na ka thaiñ 7-Amlarem Constituency hi ha ka jingbei tyngka ba 2.77 Crores.
Shuh shuh la ong ba ka jingdon jong kane ka ïing treikam thymmai kan ïarap shibun eh ïa ki paidbah ba kin ïoh ban pyndep ïa ki jingdonkam jong ki ha kaba ïadei bad ki Scheme jong ki Block bapher bapher (MBDA, NRLM, Skill Development etc) kaba don ha kawei hi ka jaka.
U ma Lahkmen ula pyntip hapoh ka Amlarem Community and Rural Development Block ki don haduh 71 tylli ki Village organizations (VO) bad 590 ki Self Help Groups (SHG) bad kine ki kynhun kila synñiang shibun eh ha ki kam ba bha ban wan rah ïa ka jingbha jingmiat bad ki jingkylla kumba ïaid ka por hapoh jong kitei ki jaka ba ki don.
