Haba la mynjur hapoh Assembly ïa ka ILP bad Ktien Khasi ka Sorkar Pdeng kam sngap, hato ïa kan sngap lada ïatai u MP Shillong?

Sngewsamut, haba u Conrad Sangma, Myntri Rangbah ka jylla, ula mynjur ban leit rah da ka rai jong ka ïing Dorbar, na ka bynta ban khang ïa ka jingtih Uranium ha ka jylla, hynrei katei ka khubor, kaba hap ban da thew da woh, la ka don dor bad don bor ne em ha khmat jong ka sorkar India, namar ba ka Khasi Hills District Council, kam pat shim ïa kajuh ka mat, halor katei ka bynta.
Hap kynmaw pat ruh, ba kitei ki jingmynjur ha ka ïing dorbar jylla, kim ju larkam satia ha khmat jong ka sorkar India, lada dei ïa ka ILP ruh em, ktien Khasi ruh em bad shu kut tang ka jingïarai shongshit, katba kat ban poi sha Delhi, la pjah noh slam slam.
Hynrei ka mat kaba kham ïar ban ïakren, ka long ba ka sorkar jylla, ka ïai khñiot na ka por sha ka por ïa ka bor jong ki District Council, naduh ka jinglong trai ha ka khyndew ka shyiap, ka jingkurup noh ïa ki mat kiba hab ha ka jingpeit jong ki District Council bad ki dorbar shnong/ dorbar Raid bad katba ka sorkar jylla, ka nang khñiot jai pa jai, kumjuh ka sorkar India, ka nang peit siar ban shu kdiah syndon tbak.
Peit ïa ka nuksa ba ka sorkar India, ka shynraiñ ban pyntreikam ïa ka UCC/CAA/NRC bad kiwei de ki aiñ jong ka, kiba hab ha ki Schedule Area, katba ka sorkar jylla, pat ka nang ñion bad shim kabu da kaba knieh lut ïa ki bor jong ki dorbar shnong, ki District Council bad ïa katei la ïohi, ba ki District Council, kim don bor ban peit ïa ka jinglong trai shnong jong ki jaitbynriew kiba hap ha u pud u sam jong ki, namar ba kim lah satia ban ai tang ïa ka syrnot Scheduled Tribe, nangta kim lah ban ai ki jingïarap kiba shi saphit sha ki paidbah kiba hab ha ki Scheduled area, kim lah ban khang ïa ki poiwir kiba leit khaïi pateng, kiba leit ïoh tnga ïa ki kynthei Khasi bad kim lah ban khang ïa ka jingdie lilam ka sorkar jylla, ïa ka khyndew ka shyiap, na bynta ka jingmyntoi jong ka, ha kaba ai sha ki karkhana, nangta kaba ai sha ki tnat sorkar, kaba ai sha ki riew shimet, kaba tei ïa ki Ïew ki hat, kaba ker sainar sha khappud Bangladesh bad nangta sa kaba kurup jaka ban shna surok bad kiwei de ki jingshim jaka kiba la i shyrkhei sat ha kine ki sngi.
Ka jingthombor jong ka sorkar jylla, ka la nang plie lad ïa ka sorkar India ba kan nang thaw ïa ki aiñ, kiba thmu ban khñiot ïa ki rit paid, lada dei ha kaba khanglad ïa ka ktien Khasi, kaba khanglad ïa ka aiñ ILP, kaba khanglad ïa ka jingpynbeit pud bad ka Assam lane bad ka Bangladesh, kaba nang khñiot tyngeh da kaba thaw ïa ki aiñ kiba kyllaiñ ban tih dewïong bad nangta sa kaba wad da ki heh spah, ba kin thied ïa ki jaka puta, sha ki par Uranium, kumba ki ju leh ha kine ki sngi ban thied jaka, ha kito kiba dei ban trei ïa ki surok kiba heh jong ka sorkar India.
Jin ban da don ki riew shemphang, ki la dei ban ïakren shai ïa ka sorkar India, ba ka Sixth Schedule, ka dei ka aiñ jong ka riti synshar ri bad nangta sa ka Instrument of Accession (IOA), ka dei kaba la ïateh naduh ki snem 1947, ba ka India, ka dei tang ka bor synshar, hynrei ki jaka puta ki hap ha ki trai jaka.
Kumta kumba la ïohi ba mynta lei ka Khasi Hills Autonomous District Council ka la mynjur sa ia la Land Bill 2021, ki la mih bun kiba pyrshah ïa kane ka Bill khamtam eh na ki Rangbah Shnong, ki sordar Shnong, ki khlieh nongsynshar shnong bad ki Hima sima kiba kwah ba dei ban ïasyllok bad ki haba ïadei bad ka jingïadie ïathied jaka naba ki la sngewthuh ba kane ka Bill ka long thik kum ka khyrdop ban khang ïa ki ban lum pisa da kaba ïoh die jaka pathar bad katba mon.
Kumta ki la pynpaw ïa ki jingpyrshah da kaba ong ba kin leit pynsngew ïa kane sha ki bor bahalor hana ba la ïuhroit ïa ka bor ka iktiar jong ki, hynrei kin ym lah ban thaw pyrthei eiei naba ki hab hapoh ka jingkhmih jong ka KHADC kaba lah ban sloit ïa ki ha kano kano ka por.
Kumta lah ban ong ba khlem ka jingïatreilang jong baroh ha ka liang ka synshar khaddar ki jingshah ïuhroit ba nabar khlem pep kin wan. Ki la don ruh ki jingpynbeij ba ha kine ki Sngi ïalap elekshon shiteng samoi sha ka Parliament Lok Sabha na Shillong Constituency ki la mih ki jingshah ïalam bakla da kaba ong ba lada ki paidbah ki jied ïa u A ne ïa u B kin leit ïasaid na ka bynta ka ILP, ka Ktien Khasi bad kumta ter ter, hynrei ki paidbah kin hap ban sngewthuh lada la mynjur da ka Ïingdorbar Thaw Aiñ ka Jylla ïa ka ILP ne ban pynrung ïa ka Ktien Khasi hapoh ka khyrnit kaba 8 ka Sorkar Pdeng kam sngap, hato ïa u ne ka MP ba tang marwei ki pyrta hapoh parliament kin urlong kita ki jingpyrta jong ki?.