Mawkyrwat, ‘Nailar, 16: Ka jingjia ba sngewsih ha ka lah sngi u Blei jong ka taïew ka la wan jia ïa ki ar ngut ki samla kiba dei ka shnong Mawlai, East Khasi Khasi Hills District ha kaba ki la ngam jyllop ha ka Wah Umngi kaba dei kawei na ki wah ba don ha u pud ba markhap jong ka South West Khasi Hills District bad ka East Khasi Hills District.
Katkum ka tyllong khubor ba la ïathuh da ki bahaïing bad ki paralok, ha ka 15 tarik mynta u bnai ki don 6 ngut shi paralok kiba leit ïa bam khana harud ka Wah Umngi.
Ha wah Umngi ki dang poi ha ka por kumba 1:00 baje nohphai sngi bad shwa ban dei ba por ban leit phai ïing ki la mut ban ïa bam ja bad shwa kata, ki la leit ban sait kti sait kjat ha wah. Jia ryngkhat ba ha kata ka por katba ki dang sum, kine ar ngut ki la kum syntuid hapoh wah bad ngam jyllop noh. Kane ka la jia ha ka por kumba 4:00 baje janmiet.
Katkum ka jingwad jingtip, la ïathuh ba kine ar ngut kiba la ngam jyllop ki dei kiba tip kyrteng kum u samla Bakordor Lyngdoh Mawphlang, 22 snem ka rta na ka shnong Mawlai Mawtawar bad u samla Bankyntiewdor Pdahkasiej, 21 snem ka rta na ka shnong Mawlai Nongmali uba dang shu dep ïoh ïa ka results BSc.
Ka tyllong khubor na ki Pulit ka ïathuh ba ha ka step sngi Baar ïa ka met jong u Bankyntiewdor Pdahkasiej la ïoh ban sei noh ha ka por 6:00 baje mynstep da uwei u nongñiah kali kamai na Mawkyrwat sha Shillong uba dei ruh u nongjngi-um katba ïa ka met jong u Bakordor Lyngdoh Mawphlang la ïoh sei da ka kynhun Search & Rescue Team jong ka tnat Fire & Emergency Service ha ka por kumba 6:30 baje janmiet napoh um.
Ha ka jingïakren bad ki lad pathai khubor, u Kñi trai jong u Bankyntiewdor Pdahkasiej, u Bah Elius Pdahkasiej u la pynpaw ïa ka sngewsih halor kane ka jingjia bad ha kajuh ka por u la ai khublei ïa baroh kiba la kitkhia ban ïarap lem ban wad ïa ka met jong kine ki ar ngut ki samla kiba la ngam jyllop bad ha kajuh ka por u la ai khublei ïa ka tnad Pulit jong ka Mawkyrwat, ka kynhun Search & Rescue Team (SRT) na Shillong, ïa u Rangbah Shnong ka shnong Lawblei kiba la donlang ban wad ïa ka met jong kine ki arngut tad haduh mynta ka sngi.
Ki bahaing hasem ki la pynpaw ba kim don ka jingtharai sniew ïano ïano hynrei ki pdiang beit ba ka dei ka jingbakla jong kine ki arngut hi kaba la poi haduh u pud ban wanrah ïa ka jingjia ba sngewsih.
