Ha u tyllai phasi pynïap hi ka samla: Kem ki pulit ïa u briew ba suba donkti bad kane ka kam

Mawkyrwat, Jylliew 25: Ki Pulit jong ka South West Khasi Hills District ki la ïoh ban kem noh ïa uwei u briew uba la suba don kti lang ha ka jingshim noh jong kawei ka samla ïa la ka jong ka jingim da kaba phasi ïa lade ha ka jingjia kaba la jia naduh ka 19 tarik bnai Ïaïong, 2026 ha ka por kumba 6:40 janmiet ha kawei ka shnong ha South West Khasi Hills District
U bah Banraplang Jyrwa, MPS uba dei u Khliehduh jong ki Pulit ka South West Khasi Hills District haba kren ha ki lad pathai khubor u la pynshai ba ka jingshim jong kawei na samla ïa la ka jong ka jingim ka dei hadien ba uwei u briew u la pyrshang bad don jingthmu ban thad ïa ki dur bad video shimet jong ka lyngba ki rynsan social media ba kynthup ïa ka WhatsApp bad Instagram kaba la poi ba haduh ba ka samla ka la shim noh ïa la ka jong ka jingim.
U la ong shuh shuh ba h ka ehjahar ba la ujor da ka hynmen jong ka samla kaba la shim ïa la ka jong ka jingim, ula ong ba ka jingshim jong ka samla ïa la ka jingim ka dei halor kane ka nongrim ba uta u briew u la thmu ban thad ïa ka long rynïeng jong ka ha ki social media.
Kumta, hadien ba ki pulit ki la ïoh ka jingujor, mar mar ki la pynlong ka jingtohkit ban lap ïa ka jingshisha halor ka jingïap jong ka samla bad da ka jingshimkhia, ki la bud-dien bad ki la ïoh kem noh ïa u briew na Surat District, Gujarat uba kyrteng u Sachin Nishad (22 snem ka rta) na ka shnong Bhidoor, Ambedkar Nagar, Uttar Pradesh kaba hapoh Baskhari Police Station ha ka 23 tarik Jylliew, 2026 ha ka por kumba 2:30 nohphai sngi lyngba ka jingïarap jong ka Palsana Police Station, Surat District.
“Hadien ka jingïoh kem, ïa une u briew la dep ban register ïa ka case hapoh Mawkyrwat Women Police Station vide Case No. 04/2026 hapoh ki kyndon 77, 79, 351(3) bad 108 jong ka Bharatiya Nyaya Sanhita (BNS), ryngkat bad ki kyndon 66E bad 67A jong ka Information Technology Act”, ong u SP bad ka jingtohkit ka la ïaid shakhmat.
Ha kawei pat ka liang, ki Pulit ka South West Khasi Hills District lyngba ka ophis jong u Superintendent jong ki Pulit ki la kyrpad ïa ki paidbah, khamtam ïa ki samla bad kito kiba shah leh kynshleiñ lyngba ka online harassment, blackmail, cyber intimidation, lane ki jingpyntieng ban pynsaphriang ïa ki dur ne ki video, ne kino kino ki jingshah pynbud nam sniew ba kim dei ban tieng hynrei ki dei ban shim ïa ka synjam ban ai jingpyntip ha ki bor pulit khnang ba kum kine ki jait kam kim dei ban ïoh lad.
U la ong ruh ba kino kino kiba mad ïa kum kine ki jingeh ne kiba shah pyntieng na ka cyber blackmail, sextortion, online harassment, ne jingshah byrngem ban pynsaphriang ïa ki dur bad video shimet, la kyrpad ïa ki ba kin ban wad jingïarap mardor lyngba kine ki jingïarap kata : Emergency Police Assistance: 112, Cyber Crime Helpline: 1930, National Cyber Crime Reporting Portal: cybercrime.gov.in, Women Helpline: 181, District Police Control Room: +91-8415886486, Mental Health Care Helpline: 14410, District Mental Health Helpline: +91-9612889267, khnang ba yn lah ban ai jingïarap ha ka por kaba biang, lyngba ki jingïasyllok (counselling) bad jingïarap katkum ka aiñ.