Ha u Naiwieng yn rah noh ïa ki mrad na Phan Nonglait Park sha Ri Bhoi

Shillong, Risaw 12 : U Myntri ka tnad Forest & Environment, James K Sangma ha ka sngi Balang u la ong ba ki buh thong ba ïa ka ‘state zoo’ kaba la ïaid shaid shaid mynta ha Umtrew, Ri Bhoi yn lah ban plie noh ha u Naiwieng mynta u snem.
“Nga dap da ka jingkmen kaba khraw ba ka jingtei ka la ïaid shaid shaid bad ngi khmih lynti ban ïoh plie noh ha u Naiwieng mynta u snem. Nga la la dep ruh ban wan jurip dalade ïa ka jingtrei,” bynrap shuh shuh u Myntri haba kren kum u Kongsan ha ka jingrakhe ïa ka Wildlife Week 2022 kaba long hynne ka sngi ha Phang Nonglait Park kaba ju tip baroh shi katta kum ka Lady Hydari Park.
Nalorkata, u Myntri u la ïathuh ruh ba ïa baroh ki mrad kiba don ha katei ka park ïa kiba la set ha ki jaka ba rit bad ba khim yn sa pynkynriah noh sha katei ka park kaba heh bad kylluid na ka bynta jong ki.
Katkum ka jingong jong u, katei ka state zoo kan long noh ruh kum ka iing shnongneh jong kitei ki jingthaw ba im.
La pyntip ruh ba ka sorkar jylla kan pyndonkam hok ïa ki sawdong sawkun jong ka Nongkhyllem Wildlife na ka bynta ban kyntiew wat ïa ki kam jngohkai pyrthei da ka jingdon ka spah mariang. U ong ruh ba ïa kane baroh ki lah ban plie lad ynda katei ka projek ka la dep.
U Myntri u la pyntip ruh ba kin sa pyntreikam noh ruh da ka ‘integrated control and command center’ ïa kaba la bei tyngka da ka Minor Minerals Reclamation Fund (MMMRF), kaba la buh thong ban peit ïa ka jingdon ki khlaw ki btap bad ruh kumno ban ïada na ka jingkyntu pud, ka jingthang khlaw bad ruh ka jingpynkhyllem ïa ki dieng ki siej.
“Shen, ngin sa lah ban pyntikna ba kane ka projek ‘integrated control and command centers’ kan ïoh ban treikam noh,” bynrap biang u Myntri.
Haba kren pat halor ka jingpynkhuid bad pynkhie im biang ïa ki wah lyngba ka pilot project, u Myntri u ong ba ka tnad kan sa pynïar ruh ïa katei ka prokram wat sha kiwei ki wah.
“Da ka jingjop jong kane ka projek, ka ai jingkyrmen ïangi ba ngin lah lah ban ïoh biang ïa ka um kaba khuid wat ha ki snem ban wan na bynta ka jylla. Ka um hi kan dei ka jingeh kaba khraw tam ba ka jylla ka lah ban kynduh. Ka jingshisha hi ka long ba bun na ki tyllong um khamtam ki wahbah bad kiwei ki tyllong um ki don ha ka jingma namar ka jingnang duna ki tyllong um kaba lah ruh ban ktah wat ïa ka jingdon ki mrad kiba im ruh,” u la ong.
U myntri ha kane ka sngi u la pyllait paidbah ruh ïa ka online portal lane ka jaka ba ki paidbah ki lah ban ujor online haba ki shem ïa kino kino ki jingjia ba ïadei bad ki mrad ba im.
Ha kane ka sngi u Myntri u la pyntip ruhba ka tnad ka dang pyrshang ruh ban pynbun shuh shuh ïa ki law adong da ka thong ban ïoh pynkylla pat ïa ki kum ki jaka ba ki mrad khlaw kin ïoh ban riehtngen lane kum kita ki wildlife sanctuary.
La pyntip ruh ba ka State Board for Wildlife hapoh ka jingïalam jong u Myntri Rangbah ka jylla, Conrad K Sangma, ka la dep ruh ban mynjur ïa ki lai tylli ki wildlife sanctuary ba kynthup ïa ka Emangre Wildlife sanctuary, Pitcher Plant sanctuary ha Baghmara, Baghmara Reserve Forest bad ka Riatkhwan Wildlife Sanctuary, Umïam.