Shillong, Jymmang, 25: Ka Dorbar shnong Mawpait Tlongpleng mynta ka Sngi ka 25 tarik Jymmang 2022 hapoh ka jingïalam u Myntri jong ka shnong Bah Donboklang Kharlyngdoh ka la leit ban ïa kynduh ïa u Executive Engineer (EE) ka PWD Road, Mawsynram Division, Bah TS Basan.
Ka jingleit kynduh jong ka Dorbar shnong ïa utei u Executive Engineer ha ryngkat ki mat jingdawa na bynta ka surok hapoh katei ka shnong, ka long hadien ka jingshah ieh bein, shah ieh khunswet ha la ki nongmihkhmat (MLA & MDC) kumjuh ruh ha katei ka tnad (PWD) la kumba 25 snem duna ei ei.
Ka surok Balat na lad Mawpen shathie sharum la dep ban shna ha kine ki 2 bad 3 snem da ka tnad PWD Road, tangba ka surok hapoh ka shnong jong ngi, ym don ba peit, ym don ba ïohi. Ki la don ki bynta, jong ka surok hapoh ka shnong jong ngi, khamtam mynta por lyiur, ki la kylla kum ki pung dohkha, la ong u Bah Kromlin Shylla uwei na ki nongaiktien ka Executive Dorbar.
U la kren bynniaw shuh shuh, ba baroh ki ju ïa ong ba u surok udei u budlum ka ïoh ka kot, tangba ha Shnong jong ngi kam Shem la long kumta.
U Secretary jong ka shnong Bah Marius Nongsiej haba ai jingkren u la pynpaw ka jingaikhublei ïa u Executive Engineer (EE), ba hadien ka jingïatai bad pynsngew ïa kitei ki jingeh na ka Dorbar, U EE , u la sngap bad shahshkor da kaba u la kular ba un sa shimkhia noh mynta u snem na ka ophis ban pynbeit ïa kitei ki jingeh ba shnong ka la mad mynta da ki phew tylli ki snem.
