Nongstoiñ, Jymmang 25: Kum shi bynta ban ai mynsiem bad ban pynshlur ïa la ki khynnah skul mynta ka sngi ka St. Joseph Higher Secondary School Nongkasen kaba don ha Eastern West Khasi Hills District ka la pynkup burom ïa ki khynnah skul jong ka namar ka jingwan shakhmat jong ki khynnah ha ka jingïalaehkai inter school ïa kaba la tip kum ka 1st Eastern West Khasi Hills District, Level Inter School Athletic Meet 2022 ïa kaba la pynlong ha sor Mairang.
Ha katei ka sngi pynkup burom ïa kitei ki khynnah la ïadonlang u Fr.Rolandus Lyngdoh Principal ka St.Joseph Higher Secondary School Nongkasen, Fr.John Albert Ryntathiang, babu Mesalin Lyngdoh Mawlot, babu Sylvester Mawleiñ Wahlang bad kiwei kiwei ki nonghikai jong katei ka skul kynthup ruh ki khynnah skul jong ka St.Joseph Higher Secondary School Nongkasen baroh kawei.
Ka skul ha katei ka sngi ka la ai ruh da ki syrnod sha kitei ki khynnah kiba la wanrah ïa ka nam jong ka skul bad ha kajuh ka por ki khynnah ki la pynshit pynshngaiñ shuh shuh ïa katei ka jingïalang da kaba ïashim bynta ha ki jingrwai, jingshad bad kiwei kiwei ki jingpynbyrngia ban pynsngewbha bad ban lehkmen lang para khynnah ha katei ka sngi kaba long ruh ka sngi ka jingjop ïa ka skul hi baroh kawei.
Ki khynnah jong katei ka skul kiba la ïoh ban khur ïa ki takma ki long haduh 31 ngut, kynthup ïa ki 13 tylli ki takma Ksiar, 8 tylli ki Rupa bad 10 tylli ki Rnong, bad na katei ka skul kawei ka khynnah kaba la tip kyrteng kum ka Isakyrsiew Lyngdoh Peiñlang ka la ïoh ruh ban khur ïa ka nam ba Kynsaitam ïa kaba ngi tip kum ka Best Athletes.
Ym tang katta hynrei katei ka skul nalor kitei ki takma bad ki nam, kitei ki khynnah jong katei ka skul ki la ïoh ruh ïa ka nam kum ka Kynhun kaba Kynsaitam ha ki Shynrang bad ka Kynhun kaba Kynsaitam ha ki kynthei, ha kajuh ka por ka la ïoh ruh ban khur ïa ka Namlahduh ha ka District ha baroh ki bynta.
