Nongstoiñ, Jymmang 25: Katba nang mih ki snem ka jingpyndonkam bording ka la nang kiew ha baroh kawei ka jylla bad ka la don ruh ka jingdawa na baroh ki shnong, la ki dei ha ki jaka sor ne jaka kyndong ruh, ba ka sorkar ka dei ban pynbiang ïa ka bording katba lah na ka bynta ki paitbah nongshong shnong.
Ha kaba ïadei bad ka jingdonkam jong ka bording ha West Khasi Hills, u nongthoh khubor u la leit ban ïakynduh ïa u Rajiv Dutta Executive Engineer jong ka tnad Meghalaya Energy Corporation Limited Nongstoiñ Division ha kaba u la ong ba ka long kaba shisha ba ka bording kam biang satia katkum ka jingdonkam jong ki paitbah, namar ba ka jylla Meghalaya kam pat lah ban pyndap bording na lade bad ka hap ban thied na kiwei pat.
U la ong ba ka dor ba ka jylla ka thied ka long kaba rem bha bad ka poi kumba hynñiew tyngka shaneng ha ka shi unit, katba ka die pat ha ki paitbah ha ka dor san haduh hynriew tyngka shi unit. Ha kajuh ka por u la ong ba na ka liang ka sorkar ruh ka la shaniah beit ha ki Kompeni bording ba kin peit kin khmih ïa baroh ki jingdonkam. Kumta ka long kaba eh haduh katta katta ban pynbiang ïa ka bording katkum ka jingdon kam jong ki paitbah.
Haba kylli pat ha kaba ïadei bad ka jingthmu jong ka sorkar ban pyntreikam noh da ki smart metre hapoh ka jylla, u Dutta u la ong ba ka jingthmu jong ka sorkar ban pyntrei kam da ki smart metre ka long kaba bha, kaba myntoi bad kaba pynsuk shibun ïa ki paitbah, namar kim don kam shuh ban pynlut por ha ka ban wan siew ïa ka bai thang bording jong ki ha ophis, hynrei kin shu siew beit na ïng dakaba pyndon kam da ki Mobile phone lyngba da kaba shu leh da ka online payment.
Nalor kata u la ong ruh ba na ka liang ka ophis ruh ka lah ban tip lut ïa ka jingpyndonkam bording jong ki longïing ba haduh katno ki pyndon kam bording man la u bnai. Haba kylli pat ba kumba ka long mynta ha West Khasi Hills palat marshiteng ki nongkyndong kiba pyndonkam bording kim pat nang satia ban leh da ka online payment lyngba ki mobile phone bad ha kiba bun ki jaka kyndong, kim don network satia bad wat ha ki jaka ba la kham long sor ruh lait noh ha Shillong ba ka network ka biang. U Dutta u la ong ba katkum ka jingthmu jong ka sorkar pdeng ka long ba hapoh ar snem baroh ki jaka hapoh ka ri ki dei ban ïoh ïa ki network ba biang.
Ha kaba ïadei bad ka rukom treikam ha katei ka ophis la ïoh jingtip na ki paitbah nongshong shnong ba u don uwei u bar jylla u ba la ju khot sin u Tuntun, u ba la shah thung kam kum u Chowkidar. Hynrei ha kajuh ka por kitei ki nongshong shnong ki la ong ba utei u Tuntun u la leh tam da kaba kam ba u dei ha ka juh ka por kum u Store Keeper bad katei ka jing leh jong utei u bar jylla, ka la pynlyngngoh ïa u Store keeper uba ka ophis ka la dep thung la slem bah.
