Nongstoiñ, Ïaïong, 11: Ka jingwan poi jong kawei ka Kompeni khyllah ha Rambrai kaba la wan rah ïa ki mashin, ki pipe nar bad wanrah ïa ki nongtrei kiba dei ki bar jylla, ha kawei ka jaka hajan ka shnong Mawïawtep kaba don kham pajih na ka surok Rambrai-Mawdoh, ka la pynlyngngoh ïa ki paitbah ha kaba ki la pyntip sha ki nongïalam ka Federation of Khasi Jaiñtia and Garo People Rambrai circle.
Na ka liang ki nongialam mar shu ïoh jingtip ki dkhot ki la leit sha katei ka jaka, ban wad jingtip ba ka dei ka Kompeni aïu kaba wan buh nongtrei ha katei ka jaka khlem da pyntip sha ki bor shnong bad wat ha ki bor hima ruh. Katkum ka jingïathuh jong ki dkhot ka seng kiba leit sha katei ka jaka, la ong ba shuwa ba kin poi ïa kitei ki bar jylla la wan kit noh kyrkieh da kawei ka kali ha kaba kim tip shuh shaei ka leit buh ïa ki. Kumta haba ki la poi ha katei ka jaka ki la lap ba ki mashin, ki tiar ki tar bad ki pipe nar kiba pyndonkam ha kaba ksam sha poh ramew, ki la don byllai. Nalor kata ki don tang ar ngut ki nongtrei kata u nongñah ïa katei ka mashin bad u nongïarap hynrei haba ki la kylli pyrthew kitei ki ar ngut ki la ong ba kim tip mano ba pynïaid ïa katei ka kam.
Ha kaba ïadei bad katei ka jingwan jong katei ka Kompeni khyllah mynta ka sngi hat majai ki nongïalam bad ki dkhot ka FKJGP Rambrai circle, ba la synran lang da ki nongïalam ka FKJGP West Khasi Hills, ki la leit ban ïakynduh ïa u bah Garod LSN Dykes Deputy Commissioner ka West Khasi Hills, ban pan jingshai ba kum u khlieh ka District u la ïoh ne em kano kano ka jingtip ne la don ne em kino kino ki Kompeni kiba wan pyntip sha u halor ka jingthmu ban ksam mar poh khyndew na katei ka thaiñ.
U bah Jiedstarland Lyngkhoi president ka FKJGP Rambrai Circle haba ïakren bad ki nongthoh khubor hadien ba ki la mih na kamra u DC, u la ong ba halor ka jingpan jingshai jong ki, na ka liang u DC u la ong ba haduh mynta um pat ïoh jingtip ei ei shaphang katei ka jingthmu ban wan ksam marpoh khyndew.
Kumta na ka liang ka seng ka la kyntu ïa u DC ba lada u la ïoh jingtip kaba bniah, un sngewbha ban pynshai lem sha ki paitbah ba kadei ka Kompeni aïu, namar lada ki kynja Kompeni kin shu wan ksam ïa ki marpoh khyndew khlem ka jingtip ki shnong ki thaw bad ki bor synshar hima ne ka District Council, ka lah ban buh ha ka jingeh kaba khraw ïa ki paitbah bad wat ïa ka mariang bad ka jingkoit jingkhiah jong ki nongshong shnong ruh.
