Plie u CEM ka KHADC ïa ka Conference Hall ha SSCM ba la bei na ka CEM Fund

Mawkyrwat, Ïaïong, 11: U Chief Executive Member (CEM) jong ka Khasi Hills Autonomous District Council (KHADC), u bah Titoswell Chyne kum u kongsan mynta ka sngi u la ïoh ban plie paidbah ïa ka jingtei ïa ka Conference Hall kaba T. 10 lak hapoh jong ka Sngap Syiem College, Mawkyrwat (SSCM) ïa kaba la bei pisa da na ka CEM Fund, KHADC ha ryngkat ka jingïadonlang u bah Carness Sohshang, MDC ka Mawkyrwat Constituency lem bad u Dr. K.K. Nongsiej, Principal jong ka Sngap Syiem College, Mawkyrwat.
Haba kren ha ka jingïalang, u bah Titoswell Chyne u la pynpaw nyngkong eh ka jingaikhublei na ka bynta u Principal jong ka Sngap Syiem College ïa kaba mynta ka sngi ki la ïoh ban rakhe ïa ka sngi kha kaba 38 snem jong ka kolej bad kyrmen ba kane ka shlem ai jinghikai kan nang-roi kan nang-par, kan nang-san kan nang-heh, nang-rangbah ha kiba bun ki liang kiba long ka jingmyntoi na ka bynta ki samla pule jong ka dong ka thaiñ bad ki samla pule kiba dang don hapoh jong kane ka kolej baroh kawei.
Haba kren ha kaba ïa dei bad ka jingplie ïa ka Conference Hall kaba la ai lyngba ka bhah na ka CEM Scheme, u bah Titoswell Chyne ula ong ba kane ka hall kan sa long kawei na ki kamra ban ïarap ha kiba bun ki bynta bad ki jingdonkam jong kane ka kolej kum kaba pynlong ki jingïalang ne kiwei de ki jingthmu. Kumta u la ruh ka jingïaroh ba naduh ki nonghikai, ki samla pule barim jong ka Sngap Syiem College ki la don bynta ha kiba bun ban pyntyllun ïa ki kam hapoh jong kane ka kolej namar dei tang da ka jingïatreilang kiei kiei kiba bha ki wan ne ki long kam.
Namarkata, u bah Titos Chyne u la ai jingkyrkhu kyrdon ïa kane ka kolej ba kan nang ïaid shaphrang da kaba kyntu ruh na ka bynta ki samla pule jong kane ka kolej ba kin long kiba trei shitom ha ki jingpule bad ban pyndonkam hok ïa ki sap ki phong ba ki ki don khamtam kyrpang eh ïa ki ar ngut ki samla pule kiba la shah pynkup burom lyngba ka jingïoh jong ki ban leit shimbynta ha kiwei de ki jaka bad kiba la wanrah ruh ka jingjop.
U bah Carness Sohshang, u MDC ka Mawkyrwat Constituency bad kum u President jong ka Allumni Association ha ka jingkren jong u u la ong ba ka jingïaid lynti jong kane ka Sngap Syiem College mynta la 38 snem ka long ka jingïaid lynti kaba dang samla bha bad ai ba nangne shakhmat kane ka kolej kan nanglah ban ïaid shaphrang ba sei ïa ki samla pule kiba don ha ki kyrdan bapher bapher. “Ha ka jingïaid lynti jong ka mynta la 38 snem, shibun ki jingeh ka la ïa kynduh hynrei ki nongpynïaid kim shym la kynran pynban ki ju trei shitom met bad mynsiem ban ai ka jingshakri na ka bynta ki samla pule jong ka dong ka thaiñ lyngba ki lad jinghikai khnang ba kin long ki samla ba bha ha ka imlang ka sahlang”, ong u bah Carness.
U bah Carness u la pynkynmaw ruh ba ha ka jingïaid lynti jong kane ka Sngap Syiem College, Mawkyrwat ka la pynmih shibun bah ki ‘riew khraw kiba long ki nongtei ïa ka imlang ka sahlang, ïa ki shnong ki thaw, ki Balang, ïa ka ïing ka sem bad kumjuh kiba tei ïa ka ri bad ka jaidbynriew. Namarkata, kum u President jong ka Alumni Association u dap da ka jingsngewkmen ba don bynta lang ha kum kane ka sngi ba khraw jong ka kolej.
Haba kren ha kaba ïa dei bad ka jingwanrah burom jong ki nonghikai bad kumjuh ruh ki samla pule, u bah Carnes u la ai ka jingkitbok kitrwiang na ka bynta jong ki ba dei lyngba jong ki kine ki samla kiba dang don hapdeng ki jingpule kin ïohi ïa ka nuksa ba bha bad ba kin long kiba trei shitom ha ki por baroh.
Kiwei pat kiba la ai jingkren ki kynthup ïa u Dr. K.K. Nongsiej, Principal jong ka Sngap Syiem College, Mawkyrwat uba la kren halor ka jingïaid lynti jong ka Sngap Syiem College, Mawkyrwat kaba la seng naduh ka 11 tarik u Ïaïong, 1985 lyngba ka Maharam Syiemship Higher Education kaba long ka nongkyrshan ne Sponsoring Body jong ka Sngap Syiem College, Mawkyrwat.
Shuh shuh la ïoh ha kane ka sngi ïa ka jingpyllait ïa ka kot, “Ka Mynnor bad ka Mynta jong ka Shnong Sakwang” ba la thoh da u Dr. Sandor Ramsiej ba la pyllait paidbah da u Dr. K.D. Ramsiej, President ka Governing Body jong ka Sngap Syiem College, Mawkyrwat.
Nangta, ka jingpynkup burom ïa u Dr. S. Ramsiej uba la ïoh ïa ka nam Doctor of Letter – D. Litt ba la pynshisha da ka Dr. S. Radhakrishnan Teacher’s Welfare Association, India bad kumjuh ruh ïa u Dr. K.K. Nongsiej uba la ïoh ïa ka khusnam National & International Compendium Life Time Education Achievement Award ba la leit ban shim ha ka 28 tarik u Rymphang, 2023 na New Delhi. Ïa ka jingïalang ha kane ka sngi la pynïaid da ka kong P. Lyngdoh Mawnai bad ïa ka jingkren ai khublei la ïoh na u bah R. Turnia bad ka jingdwai kyrkhu pynwai na u Pastor (Dr) S. Iawphniaw.