Ha ryngkatlang ba ka HYC la sdang ïa ka jingtohkit ba kynnoh sam tin sopïing kiba tat dor

Shillong, Naitung 02: Ka kynhun tohkit ba la thung da ka Tnad Housing, ha ka sngi baar ka la sdang ïa ka jingtohkit halor ka jingkynnoh sam tin sop-ïing ba tat-dor da ka Tnad sha ki paidbah, kaba la sam lyngba ki Community & Rural Developmemt Block (C&RD) ka Jylla.
Ïa kane ka kynhun tohkit la khlieh da u Joint Secretary ka Tnat Housing u LC Marak ka ban hiar tohkit ha baroh ki 7 tylli ki District ka Ri-lum Khasi bad Jaiñtia.
Lah ban pynkynmaw ba kane ka jingtohkit ka la mih halor ka jingujor jong ka seng Hynñiewtrep Youth Council (HYC) pyrshah ïa ka jingkynnoh sam tin sop-ïing ba tat dor, kaba la thied lyngba ka Chief Minister Housing Assistance Programme (CMHAP).
Ha ka sngi Ba-ar, ka kynhun tohkit ka la hiar tohkit ïa ki tin sop ïing hapoh ka kudam jong ka Tnad Housing kaba don ha Lumphira, Langkyrding, ha ka jingïadonlang ki Nongïalam ka HYC.
La sakhi ba ki dkhot ka kynhun tohkit kila thew thik pa thik ïa ka jingrben jong ka tin, ka jingjrong ka pyngkiang bad ka lynter jong ka tin, ban pynthikna la kine ki tin bala pynpoi sha Jylla, ki dei ne ki kiba ïaid katkum ki kyndon ba la buh da ka tnad.
Lah ban kdew hangne, ïa kane ka tin sop ïing la shalan da ka kompeni Hariana Iron Works Pvt Ltd, Kolkata, West Bengal bad la pynpoi ïa kine ki tin sha baroh ki District bad ki Block ka Jylla.
Haba ïathuh shaphang kane, u President ka HYC Roy Kupar Synrem ula ong ba ha ka jingthew ïa ki tin ha kane ka kudam ha Lumphira, la lap ba ka jingrben jong ka tin ka long tang hapdeng 40-41 mm, kaba duna ïa ka 45mm ba la buh da ka Tnad Housing. Ula ong ba wat ka jingkhia jong ka tin ruh ka duna bha.
Ula pyntip ba jingujor jong ka HYC ïa kane ka kam ka la mih hadien ka jingshem ïa ka jingbym bha jong ki tin ba la sam ha West Khasi Hills kynthup ka Nongstoiñ, Sohra, Khatarshnong bad kiwei kiwei.
“Ngin sa ïa hiar lang bad ka kynhun tohkit sha kine ki jaka ban ïapeit bad ïathew ïawoh ïa kine ki tin. Hadien kane ka kam, ngin sa pynkhreh ïa ki jingai jingmut ban sa phah sha ka Sorkar Jylla ïa kaei kaba ka dei ban leh,” ong u Bah Roykupar.
Kane ka kynhun tohkit kan pynlong ïa ka jingtohkit ha ki C&RD Block ka East Khasi Hills haduh ka 9 tarik Naitung, bad hadien kane kan sa hiar sa sha West Jaiñtia Hills ha ka 12 tarik Naitung, Ri-Bhoi ha ka 13 tarik Naitung, Eastern West Khasi Hills bad West Khasi Hills ha ka 16 tarik Naitung, East Jaiñtia Hills ha ka 19 tarik Naitung bad South West Khasi Hills ha ka 20 tarik Naitung.