Ban ïarap kyntiew ïa ka sap tem, aiti u Conrad da ki tiar tem sha ka kynhun Eastern Brook Band

Shillong, Naitung 02: Kum shi bynta ban pynurlong ïa ka jingangnud jong ka kynhun tem ka Eastern Brook Band, u Myntri Rangbah ka Jylla Conrad K Sangma ha ka sngi Ba-ar, ula pynïoh ïa ki tiar tem kaba ki donkam sha kane ka kynhun kaba dei ka kynhun tem kiba duna ha ka bor ïohi.
La ongh ba kane ka dei shibynta jong ka Meghalaya Grassroots Music Programme, ka flagship prokram jong ka Chief Minister Office (CMO) ban kyntiew bad kyrshan ïa ki riew donsap trai jylla.
Ka kynhun tem Eastern Brook Band ka kynthup ïa 4 ngut ki dkhot, kaba la sdang paw ha ki rynsan ïaput ïatem da ki jingtem bad jingrwai kiba sngewthiang, wat hapdeng ki jingeh ba ki ïakynduh na ka jingbym lah ïohi ki khmat.
Ka jingkyrpad jong ka kynhun ban pynïoh ïa ki tiar tem ka la seisoh da ka jingshimkhia u Myntri Rangbah ka Jylla, uba la ïapbiej ïa ka sap, ka jingaiti bad ka jingieid jong ki ïa ka put ka tem.
Ïa kine ki tiar tem la aiti sha ki dkhot ka kynhun ha ka jingïalang ba kyrpang, kaba la pynlong ha Ïingsah u Myntri Rangbah. U Myntri Rangbah ula ai jingïaroh ïa ka jingdon mynsiem jong ka kynhun bad pynshlur ïa ki ba kin ïai bteng ha kaban pynurlong ïa ka jingphohsniew jong ki.
“Ka put ka tem ka don ïa ka bor ban jam ïa u pud bad wanrah lang shijaka ïa ki briew. Nga sngewkmen eh ban kyrshan ïa kane ka kynhun donsap jong ki nongtem nongput bad nga phaikhmat ban ïohi ïa ki ba kin kynjoh sha ka thong ba shajrong,” u la ong.