Shillong, Nailar 09 : Ki nongkyrshan ba radbah jong u Bah HM Shangpliang, MLA ka Mawsynram ki la kam ba ha Mawsynram Constituency hi ki paidbah ki dang lah ka BJP shibun ban ïa ka Trinamool Congress, ka party kaba u MLA jong ki u pynïasoh ryngkat bad ki 11 ngut ki MLA ka Congress ha u Naiwieng jong u 2021.
Ïa kane la pynpaw da ki nongïalam jong ka TMC Mawsynram haba kren bad ki lad pathai khubor hadien ba ki la dep ban pynïasoh sha ka BJP ha ka jingïalang kaba long ha ophis treikam jong ka BJP kaba long ha ka nongbah.
“Kum ki nongïalam ba hakhmat jong ka TMC ha Mawsynram bad kum u Vice President haba nga peit pat la ka long ha ka Ri ne wat ha ka constituency jong ngi ruh katei ka party ka dang shem jingeh ban suhthied. Kawei ruh ba ïa ki kam jong u Modi kum u Myntri Rangbahduh ka Ri ki paidbah jongngi ki la ïohi hynrei ïa ka TMC kim pat ïohi satia,” ong u Bah Rudy Shangpliang haba kren bad ki lad pathai khubor hadien ba ki la dep ban pynïasoh sha ka BJP.
Ha kawei pat ka liang, utei u rangbah u la kyntait ba katei ka jingrung BJP jong ki kadei kaba la phah da u MLA, Bah HM Shangpliang. “Ngim tip ïa ka jingïakren hapdeng ki nongïalam ka party bad u MLA. Hynrei kane ka jingwan jongngi ka long beit ban pynkhlaiñ ïa ka BJP na ka bynta ka elekshon ban wan bad ban pynjop ïa u kyrtong jong ka,” la bynrap biang.
Ïa kitei ki nongïalam jong ka TMC na Mawsynram la pdiang burom da u National Executive Member ka BJP ba dei ruh u MLA ka Pynthorumkhrah, Bah AL Hek ryngkat ka jingdonlang u State Vice President ka party u Dipayan Chakraborty bad kiwei kiwei.
U Bah AL Hek haba kren ha katei ka jingïalang u la ong ba die ka jingtreikam kaba khuid bad kaba shai jong ka BJP kaba pynlong ïa kiwei pat ki MLA ba kin wan ban pynïasoh sha ka party. U la kob ruh ba kin dang bun kiwei pat ki MLA kiban wan pynïasoh kynthup ki MLA barim bad kiwei kiwei ki nongïalam.
