Ha KHADC ka VPP kan shna ïa ki aiñ ïada ym ban sam skhim: Powel Sohkhlet

Nongstoiñ, Rymphang, 04: “Ka elekshon MDC kaba kiba bun hi khamtam ki kyrtong ki ong ba la da jop ma nga, kin wanrah stadium, wanrah skul bad bun bah. Hynrei ngi dei ban sngewthuh ba ka kam MDC ka dei ka kam ban peit ban ïada ïa ka ri bad ka jaidbynriew. Nangta ban ïada ïa ka khyndew ka shyiap bad ban buh kyrpang ha baroh ki liang ïa ka jinglong kyrpang jong ngi”, ong u kyrtong ka VPP na Mawthadraishan Constituency u Bah Powell Sohkhlet haba kren sha ki lad pathai khubor ha ka sngi thep kyrteng.
“Ka District Council kam don than kita ki skhim pynroi namar jan baroh hi la leh la peit da ka sorkar jylla. La ka long ka sport ne ki surok bad bun bah. Ka District Council ka shu long tang kata ka bor kaba la shna da ka Sixth Schedule ban peit ban ïada ïa ka jinglong kyrpang. Lada uno uno u kyrtong ba kular ban wanrah surok, wanrah kam pynroi, uta u briew u dei u ba thok. Ki skhim ba ïoh ka District Council ki dei kiba shu ïoh na ka central government lyngba ka finance commission. Lyngba kata la ai sha ki MDC bad u MDC katba lah ei u ai katba lah sha baroh”.
“Lada nga jop ngam ong ne kular ban wanrah kam pynroi sha ki paidbah, hynrei kano kano ka skhim kaba nga ïoh lyngba ka sorkar kmie, ngin pyndonkam hok ïa kata ka lad ka lynti bad ngin ai ka jingshakri hok ïa ki paidbah, kat kaba ngi don ne ïoh”.
“Ngi donkam ban ïoh bad wanrah noh ïa ka jingsynshar kaba khuid bad baroh hi ki tip ba lada ka wan ka jingsynshar kaba khuid, baroh kine ki jingeh ba ngi mad baroh shi katta kin duh noh. Sngew synei ïa ki ba bun ki longïing ba duk, ki longïing riew kynthei bad kiwei, ba ki mad ïa ka jingjynjar sat. Hynrei, kyrmen ba lada ngi wan ha ka bor, ngin ïoh ban pynbeit lut ïa kine ki jingeh”, ong u Bah Powell.