22 klur tyngka mang ka tnat DCA ban pynlut ha ka elekshon MDC sha ka KHADC bad JHADC

0

Shillong, Rymphang 04: Kumba T. 22 klur yn pynlut na ka bynta ban pynlong ïa ka elekshon sha ka Khasi Hills Autonomous District Council (KHADC) bad Jaiñtia Hills Autonomous District Council (JHADC), ka ban long ha ka 21 tarik mynta u bnai.
Haba pyntip ïa kane ha ka sngi Baar, u Commissioner & Secretary uba khmih ïa ka tnat District Council Affairs (DCA) ka Sorkar Jylla u Bah Cyril Diengdoh u la ong, “ka jingmang pisa na ka bynta ban pynlut ha kane ka elekshon sha ADC ka long T. 22 klur.”
U la ong ba kane ka jingpynlut ka ïapher na kawei ka district sha kawei pat ka district da kaba bynrap ba manla ki deputy commissioner ki la pynlong ïa ki jingai jingkheiñ ha kaba ïadei bad kane ka kam pynlut pisa.
Haba ong ba ka tnat ka la long kaba la khreh na ka bynta ka jingpynlong ïa ka elekshon sha ADC u Bah Diengdoh u la ong ba u chief secretary Bah DP Wahlang u la pynlong ïa ka jingïalang bishar kam ha ka sngi nyngkong bad baroh ki deputy commissioner bad sub-divisional officer.
“Baroh ki la pynpaw ba ki la long kiba la khreh bad pynpaw ka jingsngewskhem na ka bynta ka jingpynlong ïa kane ka elekshon,” u la bynrap.
Ha kaba ïadei bad ki lad ai jingïada na ka liang u commissioner & secretary u la ong ba la pan shuh shuh ki lad ai jingïada na ka bynta ka western range (Garo Hills region) ha kaba kine kin ïarap shuh shuh ban pynkhlaiñ ïa ki bor pahara ha ka elekshon ha Khasi-Jaiñtia Hills region (eastern range).
“Kane ka jingpynkhreh ka la ïaid bha mynta ha kaba ki DC ki la ïatreilang bad ki SP jong ki district bapher bapher. Ngin sa shim ïa ki jingtip ba bniah na ki pulit ha kaba haduh katno ki donkam bor jingïada na western range. Kin sa pan ïa ki lad jingïada na western range ban pynkhlaiñ ïa ki bor pahara ha eastern range na ka bynta kane ka kam elekshon,” u la ong.
“Lada don ki jaka kiba don jingma ne ki bym don jingma, ki DC kin sa pyntip ïa ki pulit ha kaba ïadei bad ka protocol kaba pyrkhing bad ban don ka jingpynneh ïa ka shongsuk shongsaiñ bad kumjuh ruh na ka liang ka tnat kan shim ïa ki lad ki lynti bad kumjuh ruh ban ïasyllok bad ki nongshong shong, ki nongïalam shnong, ki seng saiñ pyrthei ban pynlong ïa ka elekshon kaba khuid kaba suba,” u la ong.
Halor kane na ka liang ki heh ka DCA la ong ba kam shym don kano kano ka jingpynkheiñ ïa ka shongsuk shongsaiñ ha kaba ïadei bad ka jingpynlong ïa kane ka elekshon ADC.
U la ong ruh ba haduh mynta ym pat ïoh kano kano ka jingujor ha kaba ïadei bad ka jingpynkheiï ïa ka model code of conduct (MCC).
“Ngi khlem pat ïoh ïa kino kino ki kaiphod kiba la ujor ha kaba ïadei bad ka jingpynkheiñ ïa ki kyndon jong ka MCC bad lada ka long kumne ruh ki pulit bad ki DC ki la shim ïa ki sienjam ban pynbeit ïa kane ka kam,” u la bynrap.

Leave A Reply

Your email address will not be published.