Ha ka sien ba nyngkong pynlait paidbah u Rangbah Jamberson Marak da ka Hindi Music Video

Nongpoh, Nailar 13: Ban kyntiew ïa ki kam ak phlim ne ki kam ring dur katkum ka juk shai ba mynta na ka bynta ki khun samla ka jylla, u Rangbah Jamberson R. Marak mynta ka sngi u la lah ban pynlait paidbah noh ïa kawei ka Jingrwai (Music Video) ba la rwai ha ka ktien Hindi bad ba la ai kyrteng, ‘Mera Dil’
Ïa kane ka Music Video ba la ai kyrteng, ‘Mera Dil’ la pynlait paidbah mynta ka sngi ha ka Youtube Channel jong u Rangbah Jamberson R. Marak ha Jadhi Restaurant Nongpoh bad kane ka jinglah ban pynlait ïa kane ka Music Video ha ka ktien Hindi ka la dei ka sien kaba ar hadien ba u la dep ban pynlait paidbah ïa ka Music Video ba la ai kyrteng ‘Syndet Syndet’.
Ïa kane ka Music Video ‘Mera Dil’ la pynmih da u Rangbah Jamberson R. Marak bad uba dei ruh u Tyngshop bad ka Bhanita Das na Assam kum ka Puron.
La sakhi lang ruh ha kane ka sngi da ka jingdon lang ki samla ka thaiñ kiba ju shimbynta haki kam ak phlim kiba kynthup ïa u Bah Rijied Khymdeit, u bah Phondar Syiem, ka kong Regina Lamo, ka Kong Lucyvia Wahlang, Joycy Mary Kharnaior, u Bah Jenewel Khongkliam, ka kong Babel Marsing bad kiwei kiwei.
Haba ai jingkren ha kane ka sngi na ka liang u tyngshop, u Bah Jembarson Marak u la ong ba watla ki don ki jingkynthoh kiba bun haka music video kaba lah dep ban pyllait dang ha kine ki bnai ba lah dep hynrei ka jingdon kiba ai mynsiem na ka por sha ka por ka la pynlong ïa u ban nang pynmih shuh shuh ïa ki Music Video.
U la ong ruh ba ka jingwan rah ïa ka puron na kiwei ki jylla ka long kum ka jingpynïajan hapdeng kine ki ar tylli ki jylla ba marsyndah kata ka Assam bad ka Meghalaya bad wat ha ka thain Shatei Lam Mihngi ka ri India ba ngi dei ban don ka jingïatrei lang na ka bynta ban kyntiew ïa ki kam rwai ne ki kam ak phlim ha kaba ha kine ki sngi ka la long kawei na ki lad ai kam ai jam ïa ki khun samla.
Shuh shuh, u la pynpaw ruh ba wat la u dei u Tyngshop ba la kham heh ha ka rta bun ki nongkynthoh ki ju kynthoh ban pynduh mynsiem khlem da tip pat ïa ka jingthmu jongu bad ka daw kaba la pynlong ïa u ban don bynta ha ki kam ak phlim ka dei namar ba u kwah ba kane ka karkhana ak phlim ka dei ban dang kiew ha ka jylal bad khamtam ha kane kajingpynmih ïa kane ka Music Video da ka Ktien Hindi ka long ka nuksa ba kiwei ki samla ki dei ban shlur namar ha kane ka juk stad ba mynta ngim dei ban shna plim ne jingrwai tang ha ka ktien lajong bad wat ha ka ktien Hindi ruh kan kyntiew bha ïa ki samla ha ka liang ka jingkamai pisa, u la bynrap.