Pynkup burom ka DS Pamrakmai ïa ki samla kiba pass bha ha ki exam
Ai jingiaroh u bah Kyrmen Shylla ïa ka DS pamrakmai kaba la pynlong ïa ka prokram pynkup burom
Khliehriat Nailar 13: Ka Dorbar Shnong Pamrakmai, East Jaiñtia Hills District, hynnin ka sngi ka la pynlong ïa ka prokram ba kyrpang ha kaba la pynkup burom ïa kito ki khynnah kiba pass bha ha ka examin SSLC, HSSLC bad ha ka graduation examination jong u snem 2022, ki la don ar phew ngut ki samla pule jong ka shnong kiba la shah pynkup burom.
Haba kren kum u kongsan u MLA ka thaiñ, u bah Kyrmen Shylla u la ai ka jingiaroh ïa ka Dorbar Shnong Pamrakmai, kaba la shim ïa kane ka bynta da kaba pynkup burom ïa ki samla kiba pass bha ha ki exam jong ki bad ong ruh ba kane ka long kum ka jingai mynsiem bad pynshlur ïa ki samla pule ba kin nang lah ban kynjoh na kawei ka kyrdan sha kawei pat bad ba kin ioh ban kheit ïa ia u soh ka jingjop, ha kajuh ka por u la kyntu ïa ki samla pule ba ki dei ban trei shitom ha ki jingpule ban poi sha ka thong.
Kum u nongmihkhmat, u la ong ba un sa ïaleh katba lah ban theh ki jingiarap ïa ka shnong ruh ban kyntiew ïa ka shnong.
Ha kane ka sngi la aiti ruh ïa ka memorandum ha u bah Kyrmen Shylla, kaba long kum ka jingpynkynmaw halor ka jingkyrpad ka Dorbar Shnong pamrakmai, ban ïarap lem ban pynioh ïa ka iïng Dorbar Shnong kaba thymmai bad ki Street Light hapoh shnong, ha kaba ïadei bad kane ka dorkhas, u bah Kyrmen Shylla u la kular ban ïarap bad ban wad ki lad ki lynti kat ba lah ban pynioh ïa kane ka jingdonkam jong ka shnong.
Kiba la ai jingkren ha kane ka sngi ki kynthup ruh u Waheh Shnong Pamrakmai, u bah I.K.Rymbai, u Assistant Waheh Shnong, u bah u bah Bormi Dkhar, u Secretary Shnong, u bah Wellson.R.D.Siangshai, u Assistant Profesor jong ka Kiang Nagbah College Jowai, u bah Chanmiki War, u President JSM-Western Region, u bah Nathan Ribok Biam, ka muktiar, ka kong Kiewlang Dkhar kaba na shnong Wapungskur, ka General Secretary JSM Women Wings Central Body, ka kong Everstay Dkhar,
La pynïaid ïa kane prokram da u Chairman Shnong, u bah Jamris Siangshaii bad la ïa don ryngkat lang ruh ki nonghikai skul, ki khynnah lem bad ki nong shong shnong jong ka shnong Pamrakmai.
Ha kane ka prokram, la sam ïa ka memento bad pisa sha ki 20 ngut ki samla pule kiba shah pynkup burom, kiba la pass bha ha une u snem 2022.
La pynbyrngia ïa ka prokram da ka jingshad na ka samla Iahunlang bad ka jingrwai na u Samla Betterning Dkhar.