Jowai, Nailar 23: Ka Lehñiam Behdeiñkhlam jong ka Seiñ Raij Mukhla ka la poi noh sha kaba kut mynta ka sngi Muchai ha Wah Biar (Aitnar), ha kaba ki khun ka Seiñ Raij na kylleng ki jaka kila wan poi ban sakhi ïa kane ka lehniam Behdeiñkhlam ba khadduh mynta u snem kaba la sdang naduh ka 20 tarik u Nailar kaba ki khot (saw sngi lai miet).
Haka phai sha kane ka lehñiam kala long kaba ishong kun bad ki khun ka Sein Raij kila leit rah ïa ki Deingkhlam ban pynpoi hajan ka aitnar, hashaw kane ka la don ka jingïakynduh lang jong ki Rong (Rot) ha Madan Slot Masi kiba la don baroh 13 tylli nangne la leit pynhiar ïa ki sha wah Biar (Aitnar) ha ryngkat ka kmen ka kynhoi bad ka jingtied ïa ka Bom, ka Bhuri, shuh shuh kine ki Rot ki don hala ki jong ki khubor sha ki paidbah naduh ka lad jingïada ïa ka mariang, ban kiar na ki jingdih pynbuaid, ka kam rep kam riang bad kiwei de.
La ïathuh ba ka jingpyndep ïa kane ka lehñiam Behdeiñkhlam ka long shibynta katkum ki riti ki Dustur jong uba rim ba jah bad ban pynpaw ïa ki dak ki shin jong ka jingbha jingmiat khnang ba u khun bynriew un ïoh ïa ka koit ka khiah, ka roi ka par, ka bha ka miat bad ka jingstad jingshem phang.
Mynta ka sngi la wan ban sakhi lang ïa ka Behdeiñkhlam naduh u Myntri Rangbah jong ka sorkar jylla u Conrad K. Sangma uba la pynpaw ka jingai khublei ïa ka Seiñraij Mukhla kaba la pynlong ïa kane ka Behdienkhlam manla ka snem bad u kitbok ba kan nang ïaid shaphrang ha ki kam ba bha.
Shi bynta na ka jingleh ñiam Behdeinkhlam u Myntri rangbha ula kular ban ai jingïarap pisa na ka sorkar na ka bynta ban pynbha ïa ka ïung Blai jong ka Seiñ Raij Mukhla bad kumjuh ïa kane ka pung aitnar ha Mukhla, shuh shuh ula pynsngew ba la dep pyllait pisa haduh 6 klur ban pynitynnah ïaka Aitnar ha Jowai.
Kiwei de kiba la wan ban ïadonlang ki kynthup ïa u MLA ka Jirang Constituency bah Sosthenes Sohtun, u MLA ka Jowai ma Walidmiki Shylla, u CEM ka JHADC ma Thombor Shiwat, ki MDC, u Deputy Commissioner ka WJHD ma Garod L.S.N. Dykes, IAS, ki Dolloi ki waheh Wasan bad kiwei de ki riew rangbah.
