Ha ka jingïalehkai kaba ar, rem ka Meghalaya ha ka Haryana

Shillong, Risaw 12 : Ka kynhun ki rangïalehkai kriket ka Meghalaya ki la mad nam rem ha ka jingïalehkai kaba ar ha ka lympung Syed Mushtaq Ali Trophy T20 tournament da 83 ron ha ka Haryana ha ka jingïalehkai hynne ka sngi Balang ha Mullanpur, Punjab.
Ka Meghalaya ka la kawang bol nyngkong bad ka la lah ban khanglad ïa ki jingkamai ron ki rangïalehkai ka Haryana kaba la buh ka thong ba 136 ron da kaba duh noh 7 wicket ha baroh ki 20 over. Ka Meghalaya ha ka jingbeh ïa katei ka ron kam lah ban tied bol khamtam ha ki bol ba la kawang da u Amit Mishra uba dei u rangkawang bol spin uba la khur 3 wicket ai kamai 10 ron. Ka Meghalaya ka la shah pynhap lut baroh ki wicket da kaba kamai tang 53 ron.
Ha ka pali kawang bol, u Rajesh Bishnoi (guest Preofessional) u khur 4 wicket mar wei ai kamai tang 12 ron ha ki saw over, uba la jied ban kawang bol nyngkong hadien ba jop ka jingkynting pisa, katba u Chengkam Sangma (1/6), Raj Biswa (1/22) bad Abhishek Yadav (1/24) ki khur mar shi wicket.
U Chirag Khurana ha ka pali tied u kamai 21 ron, katba u Dippu Ch Sangma u la ïarap kamai 11 ron. Ka Meghalaya kan sa ïoh ban pynkhreh pat ban ïakhun pyrshah ïa ka Karnataka ha ka sngi Palei.