Ha ka jingïalang bala khot pynlong da ka JCCRP, la thaw ïaka ‘Core Committee’ kaba peit bniat ïa ka jingdawa Reservation

Jowai, Nailur 09: Ka Jaiñtia Coordination Committee on Reservation Policy (JCCRP) mynta ka sngi 9 tarik u Nailur kala pynlong ïa ka “KA DORDAR KI KHON KA RI JAIÑTIA” ban ïatai sani halor ka bhah thungkam thungjam bad ka bhah pule puthi (Reservation) na ka bynta ka Ri-Lum Jaiñtia ïa kaba la pynlong ha Ladthalaboh Community Hall, Jowai.
Ka jingthmu jong kane ka Dorbar ka long ban ïa phylliew jingmut (Public Discussion) ha kaba ïadei bad ka jingthmu jong ka Sorkar Jylla ban pynkylla noh ïaka State Reservation Policy bad ka rai ka ban mih na kane ka Dorbar na ka liang ka JCCRP kan sa pynsngew shaka Sorkar Jylla lyngba ki Memorandum.
Na ka liang u Bah Sambormi Lyngdoh Secretary JCCRP haka jingkren bad ki lad pathai khubor hadien jong katei ka jingïalang kila pynbeit ban thaw noh da ka ‘Core Committee’ bad ha kane ka Committee yn jied ïa ki member bapher bapher khamtam ki riew rangbah jong ka Ri-Lum Jaiñtia.Shuh shuh ula ïathuh ba kane ka Committee kan pynkreh ïa ki jingmut kiba khlaiñ hashwa ban pynsngew sha ka sorkar jylla ha kaba ïadei bad ka Reservation Policy, ula pynsngew ruh ba na ka liang ka sorkar jylla ka la dep ban thung ïa ka Expert Committee na ka bynta kane ka kam.
“Kumta hashaw ban pynsngew sha ka sorkar ïa ki mat jingdawa kiba ïadei bad ka Reservation, ka donkam shisha ban ïatai sani bha khnang ba kano kano ka rai ba mih na kane ka Core Committee kin long kiba biang bad kiba skhem nongrim hashwa ban phah sha ka sorkar” ong u bah Sambormi. Shuh shuh ula ïathuh ba kane ka jingïalang mynta ka sngi ka long kaba sngewsuk namar ka jingwan ïashim bynta lang naduh u Prof. P. M. Passah, Advocate Erwin Sutnga, u ma Garlan Rymbai -Ex President JSU, u ma D.Pde u nongïalam shnong ba mih khmat ïaka Synjuk ki Waheh Chnong Jowai, ki Waheh Shnong, ki riew rangbah, nongïalam ka seng naduh ka JSU, JSM, JYF bad JNC bad ki dkhot ka seng JCCRP.