Ha ïewdak, Laban ba la sdang naduh ka por ki Phareng yn tei ïa ka Commercial Building

Shillong, Naiwieng 12: Ka Ïew Dak Laban kaba dei kawei napdeng ki ïew ba la rim tam ha sor Shillong kaba la sdang naduh ka por ki phareng yn sa pynbha bad pynwan dur thymmai da kaba tei ïa ka Commercial Building ha ka jinglut kaba 14,27,00,000 tyngka ïa kaba la bei tyngka lyngba ka North Eastern Council(NEC) bad ïa u mawnongrim jong kane ka buidling la plie da u Myntri ka tnat Animal Husbandry and Veterinary uba dei ruh u MLA ka Laban u Bah Sanbor Shullai.
Haba kren kum u Kongsan ha kane ka jingplie ïa une u Mawnongrim, u Bah Sanbor u la ong ba kane ka jingïoh ïa ka mang tyngka na ka NEC ka dei lyngba ka jingtreishitom bad ka jingduhthiah duhdem ryngkat ryngkat bad ki ophisar ba kynthup naduh ki jong ka Shillong Municipal Board(SMB) bad ki ophisar ka NEC.
“Nga long kum u nongkit ktien syiem ban rah kaei kaba ki paidbah ka Laban ki donkam sha ka sorkar, ban pan skhim ka long kaba suk tang na kamra thiah lah ban pan skhim hynrei ban pynïoh ka long kaba donkam ban buddien ym tang shisien arsien hynrei wat haduh ban lai ne saw sien”, u la ong.
U la ong ruh ba kane ka jingïoh ïa ka mang tyngka na bynta ban tei ïa kane ka Commercial Building kan ïarap ban seng kam thymmai ha kane ïa ïew ban ai kam ïa ki samla pule kiba la dep ki kyrdan pule bapher bapher kiba ym ïohkam ïohjam.
Shuh shuh u la ong ba da ka jingplie ïa kane ka ïew kan long kawei na ki lad ba ki nongleit siew leit tda kin wan siew noh ha kane ka ïew namar ka dor ka mur ki mar kan ryngkat bad ha Ïewduh, Khyndailad bad ong ruh ba kane kan ïarap ban pynduna shikatdei ïa ka dheng kali ha sor bad ki jingkhapngiah jong ka.
U la ïathuh ruh ba ïa kane ka Commercial Building yn pyndep hapoh arsnem ïa ka jingtei ba 5 mala kaban don kumba 400 tam ki basa.
Haba kren halor kane ka ïew u Bah Sanbor u ong ba ka dei hok ban ïoh ka jingpynbha namar shibun ki heh sorkar bad ki ophisar ki la mih lyngba kane ka ïew.
“Kiba bun bha ki ophisar ki la mih lyngba ka jingïoh kamai ki kmie ki kpa ban kyrshan skul bad pynnang pynstad da ka kamai kaba ki ïoh nangne bad nga kynmaw ruh ma ngi ynda ngi wai skul bad dep pule kot ngi ju wan kit tiar na basa i mei ryngkat bad ki dongmusa na kane ka ïew bad nga lah ban ong ba nga long kumba nga long mynta ruh ka dei lyngba kane ka ïew,” u la ong.
Haba ai jingkren na ka liang ka NEC u Bah Calvin A Kharshiïing u Adiser ka NEC(Planning Department) u la ïathuh ba ka jingïoh ïa kane ka mang tyngka ruh ka dei namar kane ka ïew ka dei kaba la rim tam bad kaba dei hok ban ïoh ïa ka jingpynbha bad pynwandur kat kum ka jingïaid ka por.
“Kiba bun ki nongkyndong lada ki wan sha sor ki ju ong ba ki wan sha Laban bad ka dei hok namarkata ba ka ïew kaba la rim bad ngan ïathuh ïa phi ba kane ka jingïoh ïa ka mang tyngka ka dei namar ki pynshong nongrim ïa kane kum uwei na ki maw ser,” u la ïathuh.
Ha kane ka sngi la ïa don ryngkat lang ruh u Bah FB Chyne u Executive Enginner ka SMB, u Bqah Ricky Shullai Co-cahairman ka Meghalaya Tourism, ki nongshong ïew ka Ïewdak Laban ryngkat ruh ki Rangbah Shnong na ki 7 Dorbar jong ka Laban.