Shillong, Naiwieng 12 : Ka Riatnohkhlieh ka jaka kaba dang hap ha ka dong Khangmasi jong ka Shnong Maraikaphon, Hima Sohra kan dei sa kawei pat ka jaka ka ban khring shuh shuh ïa ki nongwan jngohkai pyrthei sha ka thain Sohra.
Katei ka jaka nalor ba ka la don lypa ïa ki sawdong sawkun kaba ithiang la nang pynphuh bad pynitynnad shuh shuh sa ka projek na ka KHADC lyngba ka skim kyrpang kaba kot sha ka 3klur duna lyngba u MDC ka thaiñ Bah Titos W Chyne ba dei ruh u CEM ka KHADC.
Ban poi sha katei ka jaka jngohkai, ki paidbah ki hap ban leit na ka lynti ban poi sha Mawmluh hynrei ha shwa ban poi artad sha ka karkhana MCCL ki lad noh sha kamon bad nangtei hi ka shimpor tang kumba 10 ne 15 minit lyngba ka surok maw .
Ïa katei ka jaka jngohkai kaba la pynwandur i tynnad bad tei ruh da ki jaka jngohkai kaba skhem bad ohshrong bha lah ruh ban ïohi sawdong ïa ki lum ki them bad ruh ïa ka kshaid kaba noh rymphum na ka wah kaba tuid nangtei hi.
Kum ka dak ban pyntip paidbah shaphang ka jingdon jong katei ka jaka wankai, u CEM ka KHADC Bah Titos W Chyne ha kane ka sngi Saitjain u laplie paidbah ïa katei ka jaka kaba don naduh ki jaka ïalehkai ki khynnah rit, ki jaka shongkai pyngad bad ter ter haduh ki jaka peitkai kiba la shna kyrpang.
La donlang ruh ha kane ka sngi naduh u Bah Teiborlang Pathaw, Executive Member ba dei peit ïa ka tnad Council Building, u Bah Jambor War EM ka tnad Elaka bad u Bah Mitchell Wankhar EM ka tnad Fisheries jong ka Council.
Nalor kine la donlang urh naduh u Syiem ka Hima Sohra, u Pa’iem Freeman Sing Syiem, ki Myntri, u Rangbah Shnong ka Maraikaphon, u Bah E Sawian lem ki nongkitkam shnong kumjuh ki paidbah nongshong shnong.
La pynphuh shuh shuh ïa kane ka prokram da ki jingshad ki jingrwai bad ki prokram ba harukom na ki samla bad ki nongshong shnong na Maraikaphon bad ruh na ka dong Khangmasi.
