Khliehriat, Nailur 18: Ki jingïalehkai jong ka lympung phutbol ha ka kyrdan First Division bala pynïaid da ka East Jaiñtia Hills District Football Association (EJHDFA) kaba la long ha kane ka sngi Thohdieng (18 tarik Risaw, 2024) ha madan Artificial Turf, Diengshynrum, Khliehriat.
Haba phai sha ka jingïakhun ba nyngkong ha kane ka sngi, la sakhi ïa ka Wahiajer YWSC kaba la pynliem noh da 2-1 kol ïa ka Rangad SCSC.
Baroh lai tylli ki kol ki la wan ha ka kylla step ha kaba ka Wahiajer ka la ïoh ban lamkhmat 2 kol tang hapoh 10 minit lyngba ka kol na u Santosh Taron (4minit) bad u Any Manner (10minit). Ka Rangad SCSC ka la thep ïa ka shi kol ha ka 22 minit lyngba u Hame Lamo.
Haba phai pat sha ka jingïakhun kaba ar, ka Diengshynrum SC kala pynliem da 1-0 kol ïa ka Moolamanoh SC. Ka shi kol na u Enric Sympli (54 minit) ka la biang pura ïa ka Diengshynrum SC ban khur ïa ka jingjop.
Ka jingïakhun ha kane ka sngi Saitjaiñ (19 tarik Risaw, 2024) kan long hapdeng ka Shilliang Umshong SC pyrshah ïa ka R. Wahshnong SC ha ka por 12 baje mynsngi, katba ka Iatyllilang SC bad ka Hingaria Bataw YWSC ha ka por 2 shiteng nohphai sngi.
