Donkam ban pynbeit ïa ki kyndon ka NEC khnang ban lah pyndonkam ki jylla NE ïa ka song pisa sorkar pdeng

Shillong Rymphang 10 : U Myntri Rangbah ka jylla u Conrad K Sangma ha ka sngi Thohdieng ula pynpaw ïa ka jingdonkam ba ka Ministry of Development of North Eastern Region (DoNER) kan pynbeit janai bha shuwa ïa ki kyndon bad ki jingbthah, ban lah kyntiew ïa ka jinglah ki jylla ka thaiñ shatei lam mihngi ban pyndonkam bha ïa ka song tyngka ba ai ka Sorkar Pdeng.
“Ka NEC ka don ïa la ki jong ki kyndon treikam bad ki jingbthah, ïa kaba ngim kynnoh namar ba ki hap ban bud ryntih ïa ka hynrei lada ka Ministry ka pynbeit janai bha ïa kine ki rukom treikam, ïa kaba nga lah kdew haka jingïalang jongka NEC kaba la long dang shen, ngin sa lah ban pyntrei ïa kiei kiei baroh ha ka por kaba sted bha” ong u Conrad K Sangma haba ïakren bad ki nongthoh khubor.
Ha ka sngi Palei, u Secretary ka NEC u K Moses Chalai ula pynpaw ba ka jinglah pynlut ki jylla ka thaiñ shatei lam mihngi kynthup ka Meghalaya ïa ka pisa kam pat biang satia.
Da kaba kyntait ïa katei ka jingkam u heh ophisar ka NEC, u Conrad Sangma ula ong, “Lada ka jingbym lah pynlut ka Meghalaya ïa ka bhah tyngka kam long kaba biang, ngin nym lah satia ban pynlut ïa ka pisa na ka T.700 Klur sha ka T.2,000 Klur mynta. Lada ka Meghalaya kam kot ïa ka jinglah pyndonkam bha, wat ha ka Jal Jeevan Mission ngin ym lah ban ïoh haduh T.1300 Klur kaba ngi la ïoh mynta u snem bad ka ïoh tam ruh ïa ka pisa man la u snem na ka JJM.”
“Lada ka Meghalaya kam lah ban pyndonkam bha ïa ka song pisa, ka jingtei ïa ki 1.40 lak tylli ki ïing PMAY ngin ym poi sha ka bynta ba khatduh jong ki Utilisation Certificate kaba kot T.300 Klur. Ngi la dep ban pyndonkam T.1200 Klur mynta u snem kaba long ka rekod namar ha baroh ki snem haba la kyllum lang, ngi la ïoh bun tylli ki ïing mynta u snem bad la tei ïa ki hapoh jong une u snem haba ïa nujor bad ki 20 snem kiba la leit. Kumta kam long kaba suk ban shu kdew da ki katto katne ki ophisar” ula ong.
Ula ong, ba ka jingeh hi ka dei namar ba ki la don bun palat ki kyndon jingbthah bad ki kyndon treikam ha ka NEC bad ha ka Ministry of DoNER bad ïa kine ki jingeh la dep ban pynsngew ha ka jingïalang jong ka NEC.
U Myntri Rangbah ula ai nuksa, “Shisien ba ngi la sdang ïa ka project bad lashai ngi hap ban pynkylla ïa ka rukom trei ha kano kano ka kyrdan namar ka jinglong jingman jong ka khyndew ka long kaba sniew ne ki don ki jingai jingbit ki bym shym la ïoh ne ka duna ka jaka, ka rukom treikam ha kaban phah biang sha ka NEC bad ban ïoh biang ïa ka jingmynjur ka shim por da ki bnai bad ki don ki por ba ka phah biang sha ka tnad sorkar ne shu ong sha ka tnad Jngohkai jong ka ri ban pan ïa ki jingai jingmut na ka sorkar India ne kin phah ban wanrah da ki riewstad ne riew shemphang bad kum kine ki rukom treikam kabuh ha ka jingeh shibun”.
“Kumta phin ïohi ba ha ka NEC bad DoNER, kiba bun ki jylla kim lah ban pynlut ïaka pisa kaba la bhah namar ka jingdon bun palat ki kyndon treikam ïa kaba ngam kynnoh ïa ki bad kumba nga ong, lada ka jingpynlut ïa ka pisa kam don satia ngim yn lah ban ïoh ïa ka JJM ne IPMAY ne wat ïa ka Special Assistance on capital investment. Ka jingshisha ka long ba ngi la lah ban pynlut arshah ïa ka pisa kaba la mang na ka bynta ka jong ngi ha kito ki skhim kiba kot palat ïa ka hajar klur tyngka” ula ong.
“Tang ban shu ai nuksa ka bhah tyngka jong ka NEC ka long T.1900 Klur na ka bynta baroh ki jylla ka thaiñ shatei lam mhngi. Ka capital investment fund kaba ngi la pynlut ka long T.2000 Klur tang na kawei ka skhim. Kumta ka pyni shai kdar ba ngi lah ban pynlut T.2000 Klur na ka capital investment kumno kumta ngin ym lah ban pynlut ïa kaba ïoh na ka NEC,” ula bynrap.
Nalor kane, u Myntri Rangbah ula pyntip ba ka NEC kam pat ai ïa ka jingmynjur ïa ka jingtyrwa ïa ka Turmeric Mission haduh mynta.
“Na ka bynta ka Turmeric Mission, ngi la pan na ka bynta katto katne ki processing unit kiba T.5 Klur, hynrei haba la ïoh ïa ka bhah tyngka, la mih da ki kor teknoloji kiba kham biang shuh shuh, kumta ngi la kwah ban kyntiew noh ïa ki kor teknoloji bad ngi la pan na ka NEC ban ai ïa ka jingmynjur, hynrei haduh mynta ym shim la ïoh ïa ka jingmynjur” la ong u Conrad.