Shillong, Rymphang, 10: Ka Dorbar Shnong Lum Shyiap ryngkat ka jingïatrei lang bad ki Pulit ki la lap ïa ka kmie jong u khullung ba dang shu dep kha da kaba thep ha ka plastik bad bret ha kali kit ñiut.
Ka Dorbar Shnong Lumshyiap ka la aipor hapoh 24 kynta ïa kiba donkti ban wan pyndem hakhmat ka shnong shwa ban aiti sha ki bor jong ka aiñ.
U Rangbah Shnong jong ka shnong Lum Shyiap Bah Apphira Khongphai u la ïathuh ba ka kmie jong i khyllung kaba bret khun ka dei kaba la don kumba 22 snem ka rta bad ka dei ka khynnah Garo kaba shu wan trei ha iing briew ha ka shnong Lum Shyiap.
Ïa kane ka khynnah la rah noh da ki Pulit bad mynta ka dang don hapdeng ka jingshah sumar.
“Hadien ba ngi ladep ïakren bad ki bor jong ka aiñ, la wan mynstep u OC ka Pasteur Beat House bad ong ba ki bahaing ki la wan shimti ïa ka met (jong u khunlung) bad kyrpad ïa ngi ka shnong ban ai ïa ka jaka tep,” la ïathuh u Bah Khongphai bad ïathuh ruh ba ka Dorbar Shnong khlem da kyntait ka la ai jaka ban tep noh ïa ka met ba dang sah jong u khunlung da ka jingsakhi lang jong ki Pulit.
“Ngi la iit da ka jingïatreilang ki seng samla, seng kynthei bad hadien kato ngi la aiti noh sha ki Pulit bad ki la leh ruh la ka jong ka kamram. Hadien ba ladep ban leh lut ïa ki test bad la rah katto katne ki longing, la lap ba ka don kawei ka khynnah kaba shu wan trei ing briew ha Lumshyiap, ka dei ka khynnah Garo kaba dang 21-22 snem ka rta,” la ong u Rangbah Shnong.’
“Mynta ka dang don hapdeng ka jingshah sumar ha Ganesh Das Hospital,” la ong shuh shuh u Rangbah Shnong.
Haba kylli, u la ong, “tang shu ïohsngew ïa kata, ngi la kyndit bad mar ïa telephone ïa ki nonglum ñiut ka la long ka jingjah burom ïa ngi kum ka shnong. Nga la pyntip mar mar ïa ki dkhot jong ka Executive Committee jong ka shnong, ïa ka seng samla bad ïa ka seng kynthei bad ki la shimkhia ban iit haduh ban da lap, ngin ym ailad.”
U la ong shuh shuh, katkum ka jingïoh jingtip na ka trai ing ka khynnah ka dei kaba dang trei kumba lai snem. Ka dang shu wan phai na shnong na Garo Hills dang kumba shi bnai bad ka jia noh kumne.
“Ki trai ing kim suba ïano ïano ruh. Nga la kyntu ïa ki nongshong shnong lada ki ladep leh ïa ki kam kiba sniew ba kim dei ban leh ïa kum kine ki jait kam hynrei ki dei ban leit aiti noh sha Hospital ne sha kino kino ki riewshimet kiba kwah khun,” la maham u Bah Khongphai bad bynrap, ‘ban shu leh kumne ka dei ka kam pop kam sang.”
“Ngi ai khublei ïa ki nongshong shnong bad ïa ka tnat Pulit ba ngi la lait na ka jingjah burom,” u la ong.
Kum ban shu pynkynmaw hangne, ba kane ka la jia ha ka step sngi Balang mynta ka taiew ha kaba la lap ïa u khunlung ba dang khah snam la thep ïa ka plastik bad la bret ha ka kali kaba ju lum ïa ki ñiut hapoh ka shnong Lum Shyiap.
