Donkam ban ïatreilang ki jylla ka thaiñ shatei lammihngi ban kyntiew ïa ki kam jngohkai, ong u Conrad

Shillong, Ïaïong 07: U Myntri Rangbah ka Jylla Conrad K Sangma, ha ka sngi Nyngkong ula ban jur ïa ka jingdonkam ba ki Jylla ka thaiñ Shatei Lam Mihngi ki dei ban ïatreilang ha ka ban kyntiew ïa ki kam jngohkai ha ka thaiñ baroh kawei.
U Myntri Rangbah u la ong, “Ki nongshangkai pyrthei na kylleng ka Ri India bad ki ri ka pyrthei ki ithuh ïa ka thaiñ Shatei Lam Mihngi kum, “Kawei kumta ka long kaba kongsan ba ki jylla kin ïatreilang ïajan bha ha kaban kyntiew ïa ka kam jngohkai.”
Na ka liang u Conrad ula pynpaw ïa kane haba pynïaid ïa ka jingïalang High Level Task Force ba nyngkong eh halor ki kam jngohkai ba long ha ka sngi Nyngkong, kaba la ïashimbynta da u Myntri ka DoNER Jyotiraditya Scindia, u Myntri Rangbah ka Sikkim Prem Singh Tamang, u Myntri Rangbah ka Tripura Dr Manik Saha bad ki Heh Ophisar na ka Sorkar Pdeng bad ki Jylla.
Ha kane ka jingïalang la ïakren sani halor ki rukom treikam ki ban sei pyrthei ïa ka spah kam jngohkai jong kane ka thaiñ Shatei Lam Mihngi.
U Conrad ula ïaroh ïa u Myntri ka DoNER uba la shimkhia ban thaw ïa ka Task Force, kaba ula ñiew kum ka sienjam ba kongsan bha ban kyntiew ïa ki kam jngohkai ha ka thaiñ Shatei Lam Mihngi baroh kawei. Ula ong ba ka thaiñ Shatei Lam Mihngi ka la wanrah ïa ka Industrial Policy bad ka la plie lynti ïa ka jingroi jong ki karkhana.
Haba kren ha ka jingïalang, u Myntri ka DoNER J Scindia ula ong, “Ka thaiñ ka lah ban shim kabu ïa ka spah pateng la pateng bad ka jingitynnad ka mariang ban pyntyllun ïa ka roi ka par kaba neh, ban kyntiew ïa ka ïoh ka kot ki nongshong shnong bad pynkha ïa ka lad ïohkam ïohjam”.
Ka Task Force kaba la thaw da ka DoNER Ministry ba la khlieh da u Myntri Rangbah ka Meghalaya Conrad K Sangma, kan bishar ïa ki lad ki lynti ban kyntiew ïa ka kam jngohkai jong ka thaiñ, ban ai jingmut ïa ki sienjam ba donkam ban shim, ban ithuh ïa ki jingduna bad ban ai jingmut ïa ka lynti ïaid na ka bynta ka roi ka par ba pura ha ka kam jngohkai hapoh ka thaiñ.
Ha ka jingïalang, u Myntri ka DoNER ula ai jingmut ba dei ban bishar ïa ka rukom treikam (model) jong ka Ri Thailand, Cambodia, Vietnam bad kiwei ki Ri South Asia ban kyntiew ïa ki kam jngohkai bad ruh ban thaw ïa la ka jong ka rukom treikam ka ban nang kyntiew shuh shuh ïa ki kam jngohkai jong ka thaiñ.
Ïa kane ka Task Force la thaw hadien ka 72nd Plenary jong ka North Eastern Council (NEC) ba long ha u bnai Naiwieng 2024 ha Agartala, Tripura. Ïa kane ka Task Force la thaw da ka DoNER Ministry ha ryngkat ka jingïatreilang bad ka Tourism Ministry.