Ïashim bynta 830 ngut ki shynrang bad 687 ngut ki kynthei ha ka Shad Suk Mynsiem mynta u snem

Shillong Ïaïong 07: Ka Seng Khasi Sengkmie Mawkhar ha ka sngi Nyngkong ka la pynkut noh ïa ka jingleh niam shad Weiking ne ka Shad Suk Mynsiem kaba dei ruh ka jinglehniam kaba pynpaw ïa ka jingkmen bad ka jingainguh.
Kane ka Shad Suk Mynsiem kaba la pynlong lai sngi lynter kaba ju pynlong manla u snem kum ka dak jingai nguh halor ka jingbha ka rep ka riang la pynlong naduh ka 5 tarik mynta u bnai bad ka la kut noh ha ka 7 tarik mynta u bnai ha kaba da ki hajar ngut ba kynthup ïa ki nongwan jngohkai ki la wan ban ïa shim bynta ban sakhi ïa ka Shad Suk Mynsiem kaba la pynlong ha madan Weiking, Jaïaw kaba ha nongbah Shillong kaba la neh mynta la palat 100 snem.
La ïohi ba da ki spah ngut ki paidbah kiba dei na ka Niam Khasi ba kynthup ïa ki samla bad kiba la rangbah ki la shim bynta ha kane ka jingshad ha kaba ki la tem ïa ki ksing bad put tangmuri ban ai nguh ïa u Blei na ka bynta baroh ki jingkyrkhu ba u la ai.
Haba ïathuh shaphang ka jingdonkam jong kane ka jingleh niam na ka liang ki nongpynïaid ki la ïathuh ba ka Shad Suk Mynsiem kadei ka dei ka jingleh niam ban ai nguh ïa u Blei halor ki jingkyrkhu kiba bun la ka dei ha ka rep ka riang, ka koit ka khiah, ka spah ka phew bad ka suk ka saiñ.
La ïathuh ruh ba kane ka jingshad kadei kaba la sdang naduh ka snem 1911, ha kaba ka Seng Khasi ka la rai ban pynlong ha kane ka madan Weiking.
Na ka liang ki nongpynïaid ki la ïathuh ruh ba ki la don haduh 1517 ki nongshad kiba la ïashim bynta ba kynthup ïa ki 830 ngut ki shynrang bad 687 ngut ki kynthei.
Ha kane ka jingshad Suk Mynsiem la wan ban sakhi lang da u Myntri Rangbah ka jylla u Conrad K Sangma, u Symbud Myntri Rangbah u Bah Prestone Tynsong, ki Myntri ka sorkar ba kynthup ïa u Bah Paul Lyngdoh, ka Kong Ampareen bad u MP ka Shillong u Bah Ricky AJ Syngkon nalor ki MLA bad ki MDC bad kiwei kiwei ki heh ki haiñ kiba la shah khot sngewbha.
Ïa kane ka Shad Suk Mynsiem la ju pynlong manla u snem ha une u bnai Ïaïong kaba long ruh kum ka jingai nguh ai dem halor ka bha ka miat bad kiwei ki jingkyrkhu kyrdoh ba la ai u Trai Kynrad najrong na tbian.