Mawkyrwat, Ïaïong 08 : Ka Balang Presbyterian Nongnah Football Team ka la long ka lahduh ha ka lympung ïalehkai kynjatbol kaba la tip kum ka ‘Enter Balang Football Tournament 2025’ ba la pynïaid da ka Tnad Balang Presbyterian Panchiring ha madan jong ka Shnong Panchiring, South West Khasi Hills District.
Ka jingthmu jong ka jingpynlong ïa kane ka lympung ïalehkai kynjatbol ka long ban pynmih pisa ne fund ban tei ïa ka Ïingmane jong ka Balang Presbyterian Panchiring.
Haba phai ka jingïalehkai ka Balang Presbyterian Nongnah Football Team ka la jop pyrshah ïa ka Balang Presbyterian Di-tum-tum Football Team da 1 – 0 kol.
Hadien ba kut jong ka jingïalehkai, la ïoh ruh ban sam ïa ki khusnam sha baroh ar tylli ki kynhun kata sha ki ‘rangïalehkai jong ka Balang Presbyterian Nongnah Football Team bad ki ‘rangïalehkai jong ka Balang Presbyterian Di-tum-tum Football Team.
U kongsan ha kane ka sngi u dei u bah Pius Marweiñ, MLA/MDC jong ka Ranikor Constituency bad u Pastor J.S. Thongni kum u Symbud Kongsan ha ryngkat ka jingdonlang ki Pastor, ki Tymmen Basan, ki Longkpa, ki Longkmie jong ka Rangthong Presbytery lem bad ki paidbah na ka Tnad Balang Panchiring bad kumjuh ruh ki paidbah jong ka shnong Panchiring.
