Shillong, Ïaiong 08 : Ka Mawshbuit Boxing Club ha ka sngi Saitjaiñ ka la pyndap pyrda noh ïa ka Invitation Boxing Competition 2025 kaba la pynlong ha madan Dong Pdeng Mawshbuit.
Ki nongwan ïashim bynta ha kane ka Boxing Competition ki kynthup naduh ka Boxing Association East Khasi Hills , Mawshbuit Boxing Club, ka Green Heart Boxing Club, Upper Shillong Boxing Club, bad ka Rising Star Boxing Association.
Baroh ki nongïashim bynta ha kane ka jingïalehkai ki don haduh 72 ngut ba kynthup ïa ki 56 ngut ki shynrang bad 16 ngut ki kynthei.
Ka lahduh ba ïoh khur bun ki takma ha kane ka jingïalehkai ka dei ka Boxing Association East Khasi Hills kaba lah ïoh ban khur haduh 25 tylli ki takma, ka Mawshbuit Boxing Club ka la ïoh 17 tylli ki takma, ka Green Heart Boxing Club ka la ïoh 11 tylli ki takma, ka Rising Star Boxing Association ka la ïoh 10 tylli ki takma, bad ka Upper Shillong Boxing Association 9 tylli ki takma .
Haba ai jingkren ha kane ka sngi na ka liang U MLA u ai khublei ïa ka Meghalaya Boxing Association bad kumjuh ïa ka Mawshbuit Boxing Club kiba la pynlong ïa kane ka lympung ïalehkai kaba don jingmut bad kaba ïarap shibun ïa ki khun samla kiba don ka sap ka phong ha kane ka jingïalehkai.
“Mynshwa kim ju don ki khynnah kiba wan shakhmat khamtam ki kynthei ban lehkai ïa kura hynrei mynta ki khynnah kynthei bad ki shynrang ki la wan shakhmat,” u la ong da kaba ïaroh ïaki bor pynïaid kiba la pynïaid beit pynïaid ryntih ïa kane ka rynsan.
Na ka liang u Bah Everson Kharkongor uba dei u treasurer jong ka Mawshbuit Boxing Club u ong ba ka jingïaid beit ka rynsan ïalehkai kadei namar ki don bun bha kiba kyrshan kynthup naduh ka District Sports Promotion Society nangta ka Meghalaya Boxing Association bad ruh kumjuh na ki nongpynïaid ïa kane ka jingïalehkai.
