Shillong, Lber 05 : U Myntri Rangbah ka Jylla Conrad K Sangma mynta ka sngi Balang ula ong ba ka Sorkar Jylla kam pat ju ïakren halor ka mat jingtyrwa ban pyntreikam ïa ki katto katne ki kyndon na ka bynta ka Meghalaya kat kum ka Article 371 ka Riti Synshar ka Ri.
Kat kum ka jingong jong u, ka long kaba donkam ban ïakren bad ïatai sani kiei ki jingmyntoi bad jingduna jong ka Sixth Schedule bad ka Article 371 jong ka Riti Synshar ka Ri.
Haba jubab ïa ka jingkylli ba la wanrah da u MLA ka VPP na North Shillong Bah Adelbert Nongrum ha ïing Dorbar, u Conrad ula ong “Ki don ki jingmyntoi bad jingduna jong ka Sixth Schedule bad ki don ki jingmyntoi bad jingduna jong ka Article 371. Lada phi peit sha ka Sixth Schedule, ki don ki kyndon ba lah ban don ïa ka Lagislative Wing, Executive Wing bad Judiciary Wing katba ka Article 371 kam don satia ïa kine ki kyndon…kumta, ka dei ka kam kaba hap ban ïakren bad ïatai sani bha”.
Haba pynpaw ba ka Article 371 kam long kumjuh ïa baroh ki Jylla, u Myntri Rangbah ula ong “Ka Article 371 kam shym la kren eiei halor ka jingïada lane ban khang pyntreikam ïa ki aiñ ka Sorkar Pdeng. Ka jingmut jong nga ka long ba ka Article 371 kam long kumjuh ïa baroh. Ha ki Jylla bapher bapher ki don la ki jong ki kyndon jongka Article 371 . Kumta, lada phi kdew ïa ki kyndon kiba don ha Nagaland, ka mut ba ïa kane ka kam ngi hap ban ïakren bad ïatai”.
“Ka jingmut jong nga ka long ba ka dei ka kam kaba hap ban peit bniah na baroh ki liang. Phi don ïa ki jaka Sixth Schedule kaba don ia ka Legislature Wing, Judiciary Wing bad Executive Wing ki bym don satia ha ka Article 371. Mynta kaei kaba ngi jied? Ngam lah ban tip la kane ka dei ka rynsan kaba dei ban ïakren ïa baroh kine kiei kiei namar ka dei kaba hap ban ïatai lang da baroh ki paid nongshong shnong” ula ong.
Nalor kane, u Myntri Rangbah ula pynpaw ruh ba kam mih satia ka jingkylli ban wanrah ïa ka Uniform Civil Code (UCC) hapoh ka Jylla.
“Ngi la kren shai bha ba kam mih satia ka jingkylli ban wanrah ïa ka UCC ha ka Jylla jong ngi lane ba ngin pyntrei ïa kano kano ka kam ba ïasyriem kum katei” ula ong.
