Ban siew ram da u Uranium ka bym lah long, wat ju pynkulmar jingmut ïa ki paidbah bthah u CM ïa u bah Ardent

Shillong, Lber 05 : U Myntri Rangbah ka Jylla u Conrad K Sangma ha ka sngi Balang u la ong ba kan ym lah satia ban jia kumba ong da u President ka Voice of the People Party (VPP) u Bah Ardent M Basaïawmoit ba ka Sokar Pdeng ka lah ban phah siew ïa ki ram ha ka dur jong ka jingtih ïa u Uranium.
Da kaba kynnoh ba ka jingkren jong u Bah Ardent ka long kaba bakla, u Myntri Rangbah u la ong ruh, “Kum kine ki jingjïa kiba thaw bad pynkulmar jingmut ïa ki paidbah kin ym lah satia ban ïarap ban jam shakhmat. Kine baroh ki long kiba bakla lut bad kan ym don satia kiba kumta,” u la ong.
Ïa kane ka jingkynnoh, u Bah Ardent u la kren ha ka jingshim bynta ha ka jingïatai ha ka jingkren lamphang u Lat.
U Myntri Rangbah u la ong ruh ba ha rukom pyntreikam ïa ka pisa, ka sorkar India ka long shai bha ha ki kyndon bad na ka liang ka sorkar jylla ruh ki bud pyrkhing bha ïa ki.
“Namarkata, ka jingkylli ba ngi don ha kata ka kyrdan kaba nyngkong kan ym mih satia. Wat lada ki jingjia bym lah ban mutdur kin jia, hynrei ba kum kata kan urlong kan ym jia satia ba ka sorkar kan ong kumta,” bynrap biang u Myntri Rangbah.
U Myntri Rangbah u ong ruh ba u Bah Ardent u shim ïa ka nuksa jong ki ri kum ka Ukraine bad US bad shim nuksa na ki bad wanrah hangne. U ong ruh ba kane ka long kaei kaei kaba bakla bha bad kumta u kyntu ba haba leh ei ei dei ban leh kumba dei ka lynti.
Da kaba kam ba ka sorkar ka long kaba kloi ban pynshai halor ka ishu kaba ïadei bad ka ram, u Myntri Rangbah u ong ruh ba lada ka VPP ka don jingsngew haba ïadei bad ka ram na ka liang ka sorkar ki kloi ban pynshai.
“Ngi la dep ban pynshai la 100 sien bad ngin pynshai biang ïa ki kumba nga ju ong ïa baroh shaphang ki projek ba bei tyngka na shabar (externally aided projects (EAPs) ba kumno ngin siew pat ïa ki bad balei ngi shim bun. Kumta, mynta ka sngi ruh ha ka mangtyngka, nga la pyntip ba 90 persen la siew da ka sorkar pdeng.”
“Kumta, kam don kano kano ka ishu bad ka ram lane ka ishu bad ka jingshah ram bad kane kaba u kren ruh kan ym jia satia,” bynrap biang u Myntri Rangbah.