Don 93 tylli ki skul DCLP, 304 ki nonghikai bad 4317 ngut ki khynnah skul

Jowai, Naiwieng 09: Ka Dorbar Tlang jong ka Jaiñtia Hills Autonomous District Council (JHADC) kaba la long mynta ka sngi 9 tarik u Naiwieng ka la long kaba ïaid beit ïaid ryntih, la sdang ïa ka Dorbar naduh ka por 10 baje shiteng mynstep bad ka la poi ruh sha kaba kut ha kane hi kajuh ka sngi, hapoh ka jingpynïaid u shongknor ka JHADC, u Dr. Sanki Shangpung MDC.
Haba sdang jong ka Dorbar la don ka kynta kylli jingkylli na ka liang pyrshah ha kaba u ma A.A Shullai uba la kylli na ka Executive Committee haduh katno tylli ki skul DCLP bad ki nonghikai ki don haduh ka 30th September, 2023 ka jubab bala ïoh na u EM i/c ma L. Dkhar ka long 93 tylli ki skul, 304 ki nonghikai bad 4317 ngut ki khynnah skul.
Ha kaba ïadei bad ka jingduh tulop jong ki nongtrei ka Council na ka liang u ma Shullai ula pan jingshai na ka EC la ka don kino kino ki lad ban siew noh ïa ka tulop jong ki. Na ka liang u CEM ma Thombor Shiwat ula jubab ‘Na ka por sha ka por ka Council ka la dep ban pyntip sha ka sorkar jylla ban pynlait noh ïa ka bhah (share) jong ka Council’, Ula iathuh ba ki la dep ruh ban leit ïa kynduh ruh ïa u Myntri Rangbah ka jylla halor kane ka kam. U CEM hadien ka jingïakren hapoh ka ïing Dorbar mynta ka sngi ula pyntip ba yn sa pyllait ïa ka tulop ki nongtrei hapoh jong une hi u bnai.
Shuh shuh u ma Shullai ula pan jubab ha kaba ïadei bad ka nongrim la ka Council ka lah ban pyntikna ïa kito ki shnong khappud bad Assam ban pynshisha ba ki dang hap hapoh ka Council? U CEM ma Thombor ula pynsngew wat ïa ka Elaka Labang Nongphyllut ka Council ka la ïaleh ban pynphai biang ïa katei ka jaka shapoh ka Council.
Kumba long mynta u CEM ula pyntip ba ka shnong Mukroh ka dei kawei na ki shnong kaba la biang pura ïa u pud u sam ban pynshisha bad ki don ruh ki shnong kiba hap hapoh ka Council kiba dang dei pura ki jaka jong ka jylla Meghalaya.
Sa uwei u MDC ka liang pyrshah u ma B. Chyrmang ula buh jyngkylli haduh katno tylli ki Ïew kiba la dep ban rijistar haduh ka 30 tarik u September 2023. Ïa kane la jubab da u EM i/c ma E. Teron ba ki don haduh 15 tylli bad na ka liang ka Council ruh ka la ïaleh ban pynbha ïa ki kyndon aiñ na ka bynta kino kino kiba kwah ban seng ïa ki ïew.
U ma Chyrmang ula pan jubab ha kaba ïadei bad ka jingïoh jong ka Council na ka jingai ïaki Syrnot Land Holding Certificate (LHC) naduh ka 1 tarik u April haduh 30 tarik u September 2023 hapoh ka Elaka Jowai. Ha kaba la jubab ba ki don 656 tylli bad ka pisa ba ïoh lum ka poi sha ka Rs. 11,34,595/- tyngka kynthup lang ïa kiwei de ki kot donkam la jubab u EM ma A. Bhoi.
Shuh shuh ula buh jingkylli ha kaba ïadei bad ka Labang Nongphyllut Elaka ba ka Council ka la ithuh ne em ïa ka, la jubab ‘em’ da u ma F. Bareh, da kaba pynsngew ruh da u CEM ha ki snem kiba mynshwa ka dang dei hi ka jaka hapoh ka Council hynrei naduh ba la ïoh ïa ka jylla ym shem la lap shuh ïa ka.
Ha kane ka Dorbar Tlang la kynmaw burom ïa u (L) Tobias Manar u MDC barim ka Council uba la khlad na kane ka pyrthei, ha kaba ki para MDC ki la ai ruh ïa ki kyntien sngewlem sha kiba haïing ha sem jong u, ha ka juh ka por la pynlong ka jingsngap jar ba shipor. Kane ka dorbar ka la pdiang ruh jingpynkiew kyrdan ia u Johnsing Tariang sha ka kyrdan Land Record & Settlement Officer JHADC.