Shillong, Naiwieng, 09: Ka Joint Action Committee (JAC) kaba kynthup ïa ka NEHUTA, NEHUNSA, NEHUSU kaba la shong ïa ka jingïalang ha ka sngi Palei ka la rai ban pynlong da ka jingïakhih kaba khlem buh por ka ban sdang naduh ka 13 tarik mynta u bnai halor ka jingleh mynthi bad ka jingbym shah skhor jong u Vice Chancellor ka skulbah North Eastern Hill University (NEHU) u Prof. PS Shukla halor ki jingdawa jong ka JAC.
U kyrwoh ba la phah da ka JAC ba la soi da u Chairman u Prof. Lakhon Kma bad u General Secretary u Bah JP Nongbri la pyntip ba ki jingdawa ki long, ban weng kam mardor ïa u Technical Officer/Senior Consultant ba la shu thung be-aiñ, ban thung mardor ïa u Statutory Officers bad ïa u University Engineer.
Ka jingïakhih ka long ruh halor ka jinghiar arsut jong ka University Health Centre, la ong ka JAC.
Nalor kine, ka JAC ka la dawa ban pyllait noh ïa ki nonghikai bad ïa ki Technical Staffs na ki kamram. Ban thep biang ïa ka NEHU Act, Statutes bad Ordinance ha ka Official Website jong ka NEHU, ban pynlong manla ka por ïa ka Convocation, ka Marking System, ka jingpynrung ïa ki dkhot ba la jied jong ka NEHUSU hapoh ka Academic Council, ban bishar biang ïa ka Educationally Backward Area Quota na ka Block Level sha ka Village Level. Ban pyllait ïa ki jingshakri jong ki Bos, ka Um, ka bording, ka Health Centre, bad ki Section ban ïadon bynta ha ka Recruitment Process bad Pension Cell na ka bynta ban ïoh ïa ka Life Certificate of Pensioners.
