Dawa ka NESO ïa ka Sorkar India pynkut noh ïa ki jingïaumsnam ha jylla Manipur

Shillong, Naiwieng, 09: Ka North East Students’ Organization (NESO) ka la dawa tyngeh ïa ka Sorkar India ba kan khot ïa baroh ki kynhun bapher bapher sha ka miej jingïakren bad ban wanrah ïa ka rai kaba pynkut noh shisyndon ïa ka jingïaumsnam ha ka jylla Manipur.
Ryngkat lang bad ki jylla ka thaiñ Shatei Lammihngi, ka NESO ka la pynlong ruh ïa ka jingïashong kyllaiñ myngngor ha nongbah Shillong ban pynrem ïa ka jingbym lah jong ka Sorkar India ban pynkut noh ïa ka jingïaumsnam ha ka jylla Manipur kaba la kynjoh mynta la hynriew bnai kynthih.
Ha kane ka jingïakhih kaba jai jai la ïashim bynta da ki dkhot ka KSU, HITO, GSU, FKJGP, HNYF, RBYF, Shillong Manipuri Students’ Union, Kuki Students’ Organisation Shillong, Naga Students’ Union Shillong, Shillong Socio-Cultural Assamese Students’ Association,Mizo Students’ Union Shillong, Twipra Students’ Federation Shillong, Arunachal Students Union Shillong, Mara Students’ Organisation bad ka Lai Students’ Association.
Katto katne ki plakad ba la wah ha kane ka jaka, la thoh, “sangeh noh ka jingleh politik halor ka jingim briew,” “ngi dwai ïa ka jingsuk ha Manipur,”, “ko Sorkar India ka jingbym leh eiei ka pyni ïa ka jingibeiñ ïa ka North East,” “Sorkar India baieid, iehnoh ïa ka politik shadien.:
Haba kren sha ki nongïakhih, u Chairman ka NESO u Bah Samuel B Jyrwa u la ong, “da ka jingkyrshan lang jong ki seng bapher bapher, ka NESO ka dawa ïa ka Sorkar India ba kan shimkhia ban wanrah noh ïa ka shongsuk shongsaiñ ha ka Jylla Manipur. Ka dei ban khot lang ïa baroh ki kynhun bapher bapher sha ka miej ban pynlong ïa ka jingïakren khnang ba yn dup lah ban wanrah biang ïa ka jingshongsuk sa shisien pat ha ka jylla Manipur.”
“Lada ka Sorkar India ka dang pynslem ban shimkhia ka pynpaw ba ka Sorkar India kam pushe ïa ka bha ka ka miat jong ki riewlum ka thaiñ Shatei Lammihngi bad ki paid riewlum jong ka Jylla Manipur hynrei ka phaikhmat tang sha ki marpohkhyndew,” ula ong bad bynrap, “kane ka dei ka jingmaham ïa ka Sorkar India lada ki kwah ban pynlong nongwei ïa ki paidbah ka thaiñ Shatei Lammihngi na ka dewbah India, ka shong ha ka kti jong ka Sorkar India, ki dei ban leh noh mynta, lane ka por ka lah ban dier.”
Da kaba pynpaw ba ka thaiñ Shatei Lammihngi ka la mad ïa ka jingshah leh bym hok ha ki phew snem ba la leit noh, u Bah Jyrwa u la ong, “ngin ïai ong ïa kane na ka por sha ka por, pateng la pateng ba ka Sorkar India ka la leh bym hok ïa ngi hynrei ka Sorkar India ka la kyntait ba ka la leh bym hok.”
“Ki don bun ki khep haba ngi pyrkhat ïa ka thaiñ Shatei Lammihngi, hadien ba ngi la pynïasoh bad ka ri India. Ïa ka Manipur la pynïaïoh sha ka ri India da ka bor, ka Meghalaya lyngba ka Instrument of Accession la pynïasoh bad ka ri India bad bun kiwei kiwei ki jylla synshar syiem bad ki jaka ba la shu pynïasoh bad ka ri India,” u la ong.
Katkum ka jingong jong u, ka Sorkar India ka la pyndonkam da ka aiñ Ïakjakor, ka Armed Forces Special Powers Act (AFSPA) pyrshah ïa ki riewlum ritpaid ka thaiñ Shatei Lammihngi. Ki bor shipai ki leh ïa ki kam pyntriem ha kiba bun ki jylla jong ka thaiñ Shatei Lammihngi ha ka kyrteng ban ïakhun ïa ki lehnoh.
U Bah Jylla u la ong ba ka Sorkar India ka la lah bym hok da kaba pynrung sha ka thaiñ Shatei Lammihngi ïa ki mynder ri be-aiñ na ka ri Bangladesh bad mynjur ruh ïa ka Citizenship Amendment Act ha u snem 2019, khnang ban dup pynlong nongshong shnong ïa ki mynder ri beain na ka ri Bangladesh.
U la ong shuh shuh ba ka jingbym leh eiei jong ka Sorkar India halor ka jingïausnam ha ka jylla Manipur ka pynpaw shynna ba ka dei ka jingleh bym hok ha ka saiñpyrthei.
“………ngi la ïasyllok bad ki kynhun bapher bapher jong ka jylla Manipur ïa ki riewpawkhmat bapher bapher ka Manipur, ki ong bad ki kynnoh ba ka don eiei kaba kham sniew shuh shuh kaba ka khmat kam lah ban ïohi. Kane ka dei kaba kham sheptieng shuh shuh, kane ka dei ka jingjia kaba sngewsih kaba la jia ha ka jylla Manipur bad kum ka NESO ngi sngew ba ka Sorkar India ka la phiel ban weng ïa ka jingeh ha Manipur,” u la bynrap.
U President ka KSU u samla Lambokstarwell Marngar u la ong ba ka jingleh shiliang khmat jong ka Sorkar Inda ka la pynbor ïa ngi ban ngeit ba ka don ka buit barieh ban pynduhjait ïa ki jaidbynriew rit paid kiba sah ha ka thaiñ Shatei Lammihngi.
U la ong ba ka Sorkar ka la phah da ki hajar ngut ki bor bor pahara sha ka Jylla Manipur tang ban shu long ki nongpeitkai ïa ka drama bad ki bym shym leh eiei ban pynsangeh ïa ka jingïausnam. “Kane ka pynlong ïa nga ban suba jur ba ka BJP kaba bat ïa u lakam synshar ha Delhi ka don ïa ka buit barieh ban kynshoit ïa ka jingïaumsnam hapdeng ki riewlum jong ka thaiñ Shatei Lammihngi,” u la ong.
“Namarkata, ka KSU ka phah ïa u kyrwoh uba shai sha ka Sorkar India ba kan dei ban shimkhia noh mardor ban wanrah biang ïa ka shongsuk shongsaiñ ha ka Jylla Manipur,” u la bynrap.
U Presideng ka HNYF u Bah Sadon K Blah u la ong, “ka long kaei kaei kaba sngewsih ba ka jingïakajia hapdeng ki ar jaidbynriew ha ka jylla Manipur ka Sorkar Jylla bad ka Sorkar India kim shym la shimkhia ha ka rukom kaba dei. Kumba ka long mynta ka jingjia, la ka dei ka Sorkar Jylla ne ka Sorkar Pdeng kim shym la shim ïa ki lad ki lynti ban tem ai ka jingïakynad ha ka jylla Manipur bad ha kawei pat ka liang ka i kumba kan nang heh kum ban shu ong noh ba ka jingïohnong na ka jingïakynad jaidbynriew bad na ka jingïakynad saiñpyrhthei ba la ïalehkai da kiba don ha ka bor ban bat lakam ha ka jylla Manipur.”
U la buh jingkylli ruh kumno kane ka jingïakynad jaidbynriew ha Manipur kan shimpor haduh katne. “Lada ïa kane ka jingïakynad ym shym la kyrshan da kane ka kynhun lane da katai ka kynhun, kan ym lah ban long haduh katne bad kan ym lah ban neh slem haduh katne katne,” u la ong.
“Namarkata, ka don ka thong bad ka buit barieh shalyndet da ki kynrad saiñpyrthei bad ki seng saiñpyrthei halor ka jingjia ha ka jylla Manipur kiba lah ban dei na ka Jylla Manpur lane na ka Sorkar Pdeng,” la kynnoh u Bah Sadon.