Dei u Dr Mukul bad ka kynhun ki ban shet TMC bad leit rung BJP hadien ka election

Ka jingkynnoh ba ka NPP ka dei ka Team B kam long kaba don nongrim

By Mawphor News Desk On Feb 3, 2023

Shillong, K’lyngkot, 02: U Vice President jong ka National People’s Party (NPP) u Bah Prestone Tynsong uba long ruh u Symbud Myntri Rangbah ka Jylla ha ka sngi Palei u la kynnoh ba u Nongïalam jong ka Liang Pyrshah u Dr Mukul Sangma uba long u ruh u Myntri Rangbah barim jong ka Jylla lem bad ka kynhun jong u ki la suhbuit lypa ban mih noh na ka AITC bad ban leit pynïasoh sha ka BJP hadien ka Elekshon 2023.
Ha ka jingïakren bad ki lad pathai khubor u Bah Prestone u la kam ba ka la don lypa ka jingïapynbeit hapdeng u Mukul bad ka BJP.
“Nga tip ïa ka buit jong u. Lada u jop 4-5 seat un leit pynïasoh sha ka BJP. Ka dei kaba shisha bad ka la don ka jingïapynbeit, hynrei ha kano ka rukom ngam da tip hynrei u Mukul un mih beit na ka TMC…………’” u la ong.
Katkum ka jingong jong u, wat u Myntri Rangbah u Conrad K. Sangma u ladep kren lypa ïa kane ha kawei na ka jingïalang paidbah kaba la long ha rilum Garo.
Haba kyntu ïa ki paidbah ba kim dei ban shahniah hapoh ka jingïalam jong u Mukul, u Bah Prestone u la ong, “ha kano kano ka por u la lah ban phet sha kano kano ka party namarba u tip bha ba un ym jop bun ki seat (ha ka elekshon ka ban sa long).”
Da kaba pynpaw ba ka jingkynnoh jong u Mukul kam dei kaba shisha ba ka NPP ka dei ka B-Team jong ka BJP, u Bah Prestone u la ong, ba u la thikna ba u Nongïalam ka Liang Pyrshah un sa leit pynïasoh bad ka BJP hadien ka elekshon.
Ha ka 23 tarik, Kyllalyngkot, u Conrad Sangma u la maham lypa ïa ka Chairperson jong ka AICT ka Mamata Banerjee shaphang ki nongïalam jong ka ha kane ka jylla ki ban sa mih noh na ka party u la ong, “Madam Mamata Banerjee, bun na ki nongïalam ki la pynïasoh bad phi mynta, bun na ki nongïalam na ki seng saiñpyrthei ki la pynïasoh bad ka TMC. Hynrei ngan ong ïa phi bad ym dei u Conrad Sangma uba kren ïa kata, ka dei ka ktien kaba mih ha ki jaka iew bad phi lah ban leit kylli, phi don bun ki nongtrei ki ban ai jingtip ïa phi, bun na kine ki nongïalam kiba la pynïasoh bad ka TMC mynta ki la thmu ban iehnoh ïa ka TMC hadien ka elekshon. Ki ladep ïakren lypa bad ki seng saiñpyrthei bapher bapher, ki ladep ïakren bad kiba bun ki briew. Ym dei ma nga uba kren ïa kane, hynrei ka dei ka dei ka jingïakren ha iew ha hat.”