Shillong, Naitung 22: Ka ïingkashari Special Judge, Assam ha ka sngi nyngkong ka la hukum pynsajia ïa 33 ngut ki briew kynthup ïa u Chairman barim ka Assam Public Service Commission (APSC) Rakesh Paul namar ka rukom thungkam beaiñ ha ka kam Agriculture Development Officer (ADO).
U Special Judge ula pynbna ïa ka hukum halor ka case no 5/2021 ba la register bad ka Bhangagarh Police Station.
Ka ïingkashari ka la shem ïa ka jingdonkti ki 33 ngut kiba shah kynnoh haba ïadei bad kane ka jyrsieh. Napdeng kine, 4 ngut ki dei ki dkhot ka APSC, uwei u Nongtrei ka APSC bad lai ngut ki middlemen bad 36 ngut ki ADO.
Ki lai ngut ki middlemen ki kyrteng u Vikash Pincha, Kunal Das bad u Kaushik Kalita, kila lait na ka jingpynsaja jong ka ïingkashari bad kumjuh ruh u nongtrei ka APSC Syed Musharraf Hussain.
Hynriew ngut kiwei ki Ophisar (kyrtong) ba kyrteng Beauty Gogoi, Phiruj Moran, Jyotiban Dutta, Saijali Johori, Dhritiman Roy, Mousumi Saikia, Boichitra Hakmaosa ruh ki la lait na ka jingshah pynsaja.
Nalor u Rakesh Kr Paul, uba la shah pynngat ha ka jingpynsaja ki dei u Basanta kr Doley, Samedur Rahman bad 29 ki kyrtong ba ïakhun ïa ka eksam bapher bapher.
Ïa u Rakesh Paul, Samedur Rahman, bad Basanta kr Doley la pynngat hapoh ka kyndon 420 pule lang bad ka kyndon 120B jong ka IPC, kyndon 468 pule lang bad ka kyndon 120 B, kyndon 7 jong ka PC Act pule lang bad ka kyndon 120 B bad ka kyndon 13(2) jong ka PC Act, 1988 ba pule lang bad ka kyndon 120 IPC.
Ka ïingkashari ka la pyndep ïa ka jingshong bishar ïa kane ka case naduh ka 3 tarik Naitung kaba long pyrshah ïa 43 ngut ki briew kiba la shah jer kyrteng ha ka jingthungkam ïa ki ADO da ka APSC, ka selection kaba la pynlong ha u snem 2015 bad ba la pynbna ïa ka result ha u snem 2016.
Kane ka jyrsieh ka la mih pyrthei hadien ba uwei u kyrtong ula ujor da ka ejahar ha Bhangagarh Police Station ha u snem 2017.
Une u kyrtong ba kyrteng u Bedanta Bikash Das uba la ïakhun ïa ka eksam, ula ujor ejahar ba kynnoh ba ula shah dawa pisa haduh T.15 lak ban ïoh ïa ka kam ADO. U Das u la kynnoh pyrshah ïa u Chairman barim ka APSC Rakesh Paul ha ka ejahar.
