Dei ban kyntait ïa ki seng saiñhima kiba kyrshan bad ïasylla bad ki kynhun shitniam : Kyrsoibor Pyrtuh
Shillong, K’lyngkot, 03: U Bah Kyrsoibor Pyrtuh uba long u kyrtong shimet na North Shillong Constituency bad u dkhot jong ka KAM, Meghalaya u la pynrem jur ïa ka jingshah thombor jong ka Iingmane Katholik ha ka shnong Narayanpur, Chattisgarh kaba la jia ha ka Lah Sngi u Blei mynta ka taiew.
“Nga khot ba ngin ïa ieng lang kawei ban pyrshah bad pynrem jur ïa ki kynhun shit niam kam pher lada ki ïasnoh kti bad kano kano ka seng saiñ hima (Political party). Ngin rai lang kawei ban kyntait ïa ki seng saiñhima kiba kyrshan bad ïasylla bad ki kynhun shitniam kiba thrang ban pynkylla Ri Hindu ïa ka Ri India ba laitluid,” ong u Bah Pyrtuh ba la phah ha u kyrwoh sha ki lad pathai khubor ha ka Lah Sngi u Blei mynta ka taïew.
“U kyrwoh ba la phah lyngba ki WhatsApp la ïathuh ba ha ka 2 tarik Kylla lyngkot 2023 kumba 1000 ngut ki riew shit niam bym dei Khristan ki la thombor ïa ka Iingmane Catholic ha ka shnong Narayanpur. Ha kine ki khyndiat bnai ba la lah ki Khristan ha kylleng ka Ri India ki shah ban beiñ bad ki riewngeit Khristan ki shah shoh shah dat khlem daw. Ha ka Jylla ba marjan, ka Assam ngi ïohi ba la pynher syrngiew ïa ki Balang Khristan da ki shithi na ki bor Sorkar kiba pan jingkheiñ ïa ka jingdon briew bad kumta ter ter,” ong u kyrwoh.
“ñiuma kane kam dei kaba thymmai, ki riewshitniam kiba dei ki dkhot jong ki seng shitniam Hindu ki la thombor ïa ki ritpaid bad ki Khristan ha kylleng ki Jylla. Naduh ka snem 1999 haba la thang im ïa u Graham Staines bad ki khun jong u haduh ka jingïap u Father Stan uba la shah pharep bad ïap kum u koidi khlem ka jingbishar hok ha ka snem 2021. Hapdeng kine ki snem ki la jia shibun bah ki jingthombor pyrshah ïa ki Khristan bad kiwei ki ritpaid. Ha ka snem 2007 ha ki taiew lehkmen aiom Khristmas ki riewshitniam hindu ki la thombor ïa ki Khristan ha ka shnong Khandamal. La thang bad pynjot ïa ki Iingmane bad ki don ruh kiba la ïap bad mynsaw,” la ong u Bah Pyrtuh.
“Lada ma ngi ki Khristan ha ka Jylla Meghalaya ngi pyrkhat ba kine ki jingshah thombor ki Khristan ha kiwei ki Jylla kim ktah eiei ïa ngi namarba kim jia ha ka Jylla jong ngi te ngi la bakla shibun,” la kyrpad u Bah Pyrtuh.