Shillong Risaw 07: U MDC ka Tura u Bernard N Marak u la thoh ka shithi sha u Symbud Myntri Rangbah ka jylla u Bah Prestone Tynsong ha kaba u la pynpaw ïa ka jingbym pynlong ïa ka People’s Plan Campaign (PPC) ha Garo Hills bad kynnoh ba la pynkheiñ ïa ka jingangud hapoh ka jingmynjur hapoh ka Tripartite Agreement hapdeng ka kynhun ïaleh pyrshah bad ka jylla bad ka sorkar Pdeng.
Ha ka shithi u Marak u la ong ba ka PPC, ba la pynlong kongsan da ka sorkar pdeng ka la buh por ha ka 2 tarik mynta u bnai lyngba ki Gram Sabha ha Garo Hills. Ka jingïalap la pynwandur ban pynthikna ka jingïashim bynta ki paidbah ha ki kam pyrkhat ka roi ka san da kaba shim ïa ki jingai jingmut ki paidbah bad ban pynrung ïa ki jingtyrwa hapoh ka PPC portal.
Hynrei u Marak u la kdew ba khlem pat pynlong ïa ka Gram Sabha, khlem sam ïa ki jingtip bad ki dkhot ba la shah jied, bad khlem load ki jingtreikam, da kaba ong ba kane kadei ka jingbym kheiñ ïa ka jingdonkam ka jingïashim bynta ki paidbah bad pynkheiñ ïa ki jingbthah ka sorkar Pdeng.
U la kyntu ïa ka jingtuklar ba mardor ban bthah ïa ka GHADC bad ki block ban pynlong ïa ka PPC kaba khuid bad ban kynthup pura ïa ki paidbah.
U Marak u la ong ba ïa ka Tripartite Agreement, kaba dei ban pynlong manla ka 2 bnai ka khlem pat long naduh ka 26 tarik u nailur 2025.
Ïa ki kopi ki shithi la dep phah sha u Union Home Minister u Amit Shah, ki heh ophisar ka Ministry of Home Affairs bad Panchayati Raj.
U Marak u la maham ba lada pulom ban pyntreikam noh kloi kan pynbor ïa ki paidbah ban leit sha ka aiñ naba pynkheiñ ïa ki jingthmu jong ki kyndon aiñ bad ki jingmynjur.
