Pynsangeh shwa shipor ïa ki mrad ba wanrah nabar kiba khlem pat phah eksamin: HFU

Shillong, Risaw 07: Ka Hill Farmers’ Union (HFU) ka la dawa ïa ka Tnad Ri Jingri bad Veterinary ban buh ïa ka jaka talasi bad bishar koit khiah jong ki mrad ha Narang, Ri-Bhoi, ban peit bniah ïa ki jingri kiba wanrah na kiwei ki jylla, khamtam ha ka por ba ka jingpang African Swine Fever (ASF) ka la ktah ïa ki nongri sniang ha Meghalaya.
U General Secretary ka HFU, u Bah Alfondbirth Kharsyntiew, u la ïakynduh ïa u Director ka Tnad Ri Jingri bad Veterinary, u Dr. B. Kharshandy, bad aiti ïa ka dorkhas ban dawa ïa ki lad talasi, bishar koit khiah bad buh kyrpang ïa ki jingri kiba wan rung sha ka jylla.
Haba kren sha ki lad pathai khubor, u Bah Kharsyntiew u la ong ba ka tnad ka dei ban peit bniah ïa ki sniang, ki masi bad ki doh kiba wanrah na shabar jylla. U la kyntu ruh ïa ka Tnad ka Koit ka Khiah, ki bor Food Safety bad ka Tnad Veterinary ban ïatreilang bad shim ïa ki lad jingïada kiba donkam.
Ha ka dorkhas kaba la ai ha ka 5 tarik Risaw, ka HFU ka la kam ba da ki hajar tylli ki sniang ki la ïap ha ki bnai ba la leit, kaba la wanrah ïa ka jingduhnong kaba khraw ïa ki nongri sniang bad ki longïing kiba shaniah ha kane ka kam ban kyrshan ïa ka jingim.
Ka seng ka la kynnoh ba ki sniang na shabar jylla ki wan rung khlem ka jingtest, ka jingbishar koit khiah, ka jingpynshisha ïa ki syrnod ka koit ka khiah bad ka jingbuh kyrpang ban peit ïa ka jinglong jong ki. Katkum ka jingïathuh ka HFU, ka jingduna ha ka jingpeitngor ïa ki jaka rung sha ka jylla ka buh jingma ïa ki jingri bad ïa ka kamai kajih jong ki nongrep.
Namarkata, ka seng ka la dawa ban pynsangeh shipor ïa ka jingwanrah ïa ki jingri bym pat shah test, khamtam ki sniang, tad haduh ba la buh ïa ka rukom talasi bad bishar koit khiah kaba biang.
Na ka liang ka HFU ka la dawa ruh ban buh ïa ki jaka talasi Veterinary kiba neh ha baroh ki jaka rung ba kongsan sha ka jylla. Ka la ong ba dei ban peit ïa ki syrnod kiba pynshisha ba ki jingri ki bit ban shah pynkit, bad ïa ka kaiphod test ASF jong ki sniang na ka jaka ba la wanrah ïa ki, ryngkat ka jingbuh kyrpang ban peitngor ïa ka koit ka khiah jong ki shuwa ban shah pynpoi sha ki jaka ri.
Ban tehlakam ïa ka jingpang ha ki jaka ba shah ktah jur, ka seng ka la kyntu ban phah ïa ki kynhun Veterinary ban peit ïa ka jingpynkhuid bad jingpyndonkam ïa ki lad bret ïa ki met sniang ba ïap katkum ka rukom kaba biang. Ka la dawa ruh ban sam ïa ki tiar bad dawai pynkhuid sha ki nongri sniang, ryngkat ka jingpyntreikam ïa ki lad jingïada ban khanglad ïa ka jingsaphriang jong ka jingpang.
Nalor kane, ka HFU ka la dawa ïa ka rukom ai bai lutksan kaba suk bad kaba kloi ïa ki nongri sniang kiba la duh ïa ki jingri na ka ASF, khnang ba kin lah ban sdang biang ïa ka kam jong ki hadien ba la tehlakam ïa ka jingpang.
Ka seng ka la kyntu ïa ka tnad ban shimkhia kloi ïa kine ki jingdawa, da kaba pynpaw ba ka jingpeitngor kaba biang bad ka jingïarap kaba wan ha ka por ki long kiba donkam ban ïada ïa ki jingri bad ïa ka kamai kajih jong ki nongrep ha Meghalaya.