Dawa tohkit CBI ka KSKBUH halor ka jing shah siat iap u nongïalam barim ka HNLC

0

Shillong, Risaw 10 : Ka sur Ka Bri U Hynniewtrep (KSKBUH) ka dawa ba ka sorkar ka dei ban aiti tohkit sha ka SBI halor ka jingshah siat iap u nongïalam ba rim ka seng HNLC u bah Cherishterfield Thangkhiew.
Halor kane ka jingdawa ka seng ka la phah da ka jingthoh sha u Myntri Rangbah ka jylla u Conrad K Sangma mynta ka sngi. Ka Seng ka pan jingïarap noh na u Nongïalam ka Liang Pyrshah u Dr Mukul Sangma bad na ki 36 ngut ki MLA na Khasi bad Jaintia ba kin banjur ïa ka sorkar ban pyntreikam ïa kane ka jingdawa.
“Da kaba pynshong nongrim ha ka kaiphod jongka Commission u Nongbishar T.Vaiphei,ngi dawa ba ka sorkar ka dei ban aiti noh mar mar ïa ka jingtohkit sha ka CBI khnang ban paw pyrthei lut kiba donkti ha ka jingsiat iap ïa u bah Cherishterfield Thangkhiew” ong ka KSKBUH.
La pynpaw ruh ba kat kum ka kaiphod jongka Commission la pynpaw ba lada ka jingthmu ka long ban kem im ïa ubriew hynrei ka rukom leh pat kam ïahap shuh ka long kaei kaei kaba sngewsih shisha.
Kane ka jingkynthoh ha ka kaiphod ka pynsuba jur ba ka don kaei re kaei sha lyndet ban pynleit ne dkhat noh ïaka jingim jong une u nongïalam ym ban kem im satia ïa u. “ Kumta ngi sngewdonkam ban don da ka jingtohkit kaba bniah ban paw ki jinshisha baroh bad ban pynshitom kat kum ka aiñ ïa kito baroh kiba donkti” ong biang ka seng.
Hadien ka jingtohkit ba 9 bnai ka Commission ka la aiti ïa ka kaiphod sha ka sorkar. Ha kane ka kaiphod la pynpaw shai ba ka jingpynkhreh ban leit khynra ka long kaba biang hynrei ka jingpyntreikam pat kam long kumba la plan namar ka duna palat bad la leh ruh hapdeng ka jingkyrkieh khlem da pyrkhat sani bha da kata ka Tactical Team-I.
Ka jingtohkit ruh ka la lap ba ka jingleit khynra ha ïing jong u bah Cherish ha ka 13.8.2021 ha ka por 3 baje ka long kaba khlem da pyrkhat sani bha bad la shu pyndonkam palat ïa ki bor pahara kaba la wanrah haduh ka jingiap ïa une u nongïalam.
Kumta ka KSKBUH ka lap kat kum ka kaiphod ba ka jingwan khynra ka long ka bym biang satia la shu leh kyrkieh bad pyndonkam palat ïa ki bor pahara bad halor kane ka nongrim ka dawa ba dei ban aiti tohkit sha ka CBI khnang ba ki jingshisha kin paw lut bad ban pynshitom kat kum ka aiñ ïa kiba donkti ha katei ka kam.
Kham mynshwa ka sorkar ka ong ba ka dang ap ïa ka kaiphod jongka jingtohkit namar katba ym pat dep ka jingtohkit ym lah ban pynshitom ïano ïano ruh. Hynrei haba la dep ïoh ïaka kaiphod ruh ka sorkar kam leh ei ei ka shu shong thiah thai halor ka kaiphod ban ïada ïa kito kiba donkti da kaba ai daw ban pan jubab shwa na ki ha ka jingshisha la dei ban shu leh beit da ka kam ym ban dang ïai pynslem shuh pynkut ka shithi na ka KSKBUH.

Leave A Reply

Your email address will not be published.