Shillong, Risaw 10: Ki Khasi ba shong ba sah ha ri Bilat, ki la ïashim bynta da ki sur jingrwai bad shad tynrai ha ka Prokran pyni Kolshor ba la pynlong da ka Women of North East Support Network (WNESN) ha United Kingdom, kaba la long ha ka 7 tarik mynta u bnai ha nongbah London.
Ka kyrwoh ba la phah da u Dr. Bremly WB Lyngdoh, ka ïathuh ba kane kadei ka prokram ban pyni ïa ka kolshor jong ki jaidbynriew bapher bapher jong ka thaiñ shatei lammihngi kiba sah ha ri Bilat bad la pynlong ryngkat ka jingïatreilang bad ka Nehru Centre, London.
Ïa ka Women of North East Support Network la seng ha ka snem 2020 ha ka por jong ka jingpang khlam COVID 19 da ka jingthmu ban wanrah ïa ka jingïatreilang jong ki jaidbynriew na kane ka thaiñ.
Na ka liang ki Khasi ki la pyni da ka jingshad tynrai ba la tip kum ka Shad Shohkba bad kumjuh ruh da ka jingrwai Sier Lapalang.
Nangta na ka liang ki paid Khasi kiba shong ha nongbah London, ki la pynpaw ka jingsngewkmen ban ïashim bynta ha ka prokram pyni kolshor kaba kum kane, namar ba ki ïoh ïa ka lad ban pyni ïa la ka jong ka Kolshor sha ka pyrthei, namar ba ka Kolshor u Khasi ka long kaba riewspah bha.
Ha kane ka Prokram la ïadonlang ruh u High Commissioner jong ka India ha Bilat, u Vikram Doraiswami bad u Deputy Director jong ka Nehru Centre, u Sanjay K. Sharma.
Nalor kane ka jingpyni Kolshor mynta ka sngi, la sdang ruh sa ka Exhibition ka ban pynkut ha ka 14 tarik mynta u bnai.
