Nongstoiñ, Ïaïong 9: Ki paidbah nongshong shnong jong ka thaiñ Nongtrai ba kynthup ïa ki palat 30 ei ei tylli ki shnong, ki la kyntu ïa ka tnad ka koit ka khiah jong ka sorkar jylla bad ïa u myntri ba dei peit ïa ka tnad ka koit ka khiah, ba un thaw ki lad ki lynti ban kyntiew kyrdan noh ïa ka Umsohpieng Sub Centre.
Ka sur na ki paidbah ka thaiñ Nongtrai ka long ba katkum ka jingïaid jong ka por bad ka jingroi ki paidbah nongshong shnong, katei ka Sub Centre kam lah shuh ban shakri ïa ki paidbah. Tad haduh u snem 2011 ka jingdon ki nongshong shnong, ka long kumba 5378 ngut ha katei ka thaiñ. Hynrei kat nang mih ki snem ka jingdon ki nongshong shnong ka la nang roi.
Halor kane ka juh ka phang, ka seng Hyn-ñiewtrep Youths Council Nongtrai Area unit, ka la leit ban buh jingthoh ban dawa kyntiew PHC noh ïa ka Umsohpieng Sub-Centre ba dei ka jaka ai jingsumar ïa ki paidbah ka thaiñ Nongtrai baroh kawei.
Ka seng hadien ba ka la peit pyrman bha ïa ka jinglong jingman ha ka thaiñ Nongtrai, ka la I dei ban Dawa noh da ka Umsohpieng PHC ha ka jaka jong ka Umsohpieng Sub-Centre katkum ka jingdonkam jong ki shnong kaba la kot haduh 30 tylli ki shnong ba katei ka Centre.
Ka seng ka la buh da ka jingthoh ban dawa na ka sorkar lyngba I District Medical Health Officer (DMHO) West Khasi Hills District. Na ka liang I DMHO I Dr M.Bareh I la ong ka sorkar mynta ka dang ïaleh ban pynbha ïa baroh ki jaka ai jingsumar kiba la don lypa.
Na ka liang ka seng ruh ka kyntu ba ki paidbah kin shah shitom, namar ka liang ka seng kan ïai buddien ïa kane ka bynta ban wanrah jingsuk ïa ki paidbah, ong u President HYC Nongtrai Area Unit u samla Ollnington Sohmad.
