KA JINGDHENG KALI HA LADRYMBAI BAD KHLIEHRIAT- SOHSAT U NONGLEIT NONGWAN.

Katba nang ïaid ki por ki sngi, ka jingbun briew ha ki jaka sor jong ka jylla kala nang kiew nangkiew bad ïa kane la sakhi ym tang ha sor Shillong ne sor Jowai hynrei ka jia ruh ruh ha ki sor thymmai kum ha sor Khliehriat, East Jaiñtia Hills District.
Ka jingbun briew na ka jingïabeh ïa ka jingnang jingstad, ka trei ka ktah, ka jing bylla , ki jaka sumar, ki ïew ki hat bad ka khaïi ka pateng nalor kiwei kiwei pat ki jingdawa kiba hakhmat tam ha ka jingim briew.
Ka jingbun briew ka pynlong pat ïa ka jingbun ki kali ki motor ba leit ba wan kaba wanrah ïa ka jingdheng kali ne sahkut kali kum shi bynta ha ka jingim jong ngi ki nongshong shnong ha man la ka sngi. Ka Jingsahkut kali ba man ka sngi ka jia ymtang ha Shillong ne Jowai, hynrei ïa kane la sakhi ha Ladrymbai bad ha Khliehriat ruh na ka jingjur ka jingbun palat ki kali nalor ka jingkhapngiah ki briew ba leit ba wan ha u surok, bunsien bunsien ka pynpulom ïa ka jingthmu jong ngi haba ïabeh ïa ka por lada dei sha ki jaka pule puthi ne sha ki jaka trei jaka ktah khamtam ha ka pang ka shitom tang na ka daw ka jingdheng kali ha kine ki ar jaka kaba jia man ka sngi.
Ka dawbah ka ba pynlong ia ka jingdheng kali ka dei na ka jingbym don jong ka tnad pulit ban pynïaid kali (Traffic Branch) kaba paka hapoh ka District hi. Ki kali rit ki ïoh ban leh katba mon bad ban pynieng kali katba mon harud ka surok bah NH-6 khamtam ha ki thaiñ Ladrymbai bad Khliehriat, ymtang ba ki ïoh ban ïeng katba mon hynrei kida ïohlad ruh wat ban kynran bad phai dien (Reverse) hapdeng surok bah kata ruh wat hapdeng ka jingbun kali.
Nangta shuh shuh, sa kawei pat ka daw bah jong ka jingdheng kali ka long ka jingleh bym phoida bad bym bna eiei jong ka sorkar ban maramot ne pynbha ïa ka surok Ladrymbai Bye-pass uba la shna khnang khnang ha ka nongrim ban ïada na ka jingkhap ngiah ki kali ha ki thaiñ Ladrymbai. Phewse, ka jingsniew palat ha ka jinglong jingman jong kane ka surok Bye-Pass ka la pynlong ïa baroh ki jait kali naduh ki kali heh haduh ki kali rit ban leit ban wan beit beit na u surok bah NH-6 na Ladrymbai bad kane kada ktah shibun eh ïa ki nongleit nongwan naka daw ka jingsah kut ki kali man la ka sngi nalor ba ka wanrah jingma ruh ïa ka jingim briew naduh ki khynnah skul haduh ki tymmen ki san ba ïaid na kane ka surok na ka daw ka jingbym biang ki lynti ïaid kjat (Foot Path) narud u surok bah.
Mynta ka jingkylli ba hakhmat tam ïa ka Sorkar khamtam ïa u Myntri kam pohiïng (Home Minister), Hato ka East Jaiñtia Hills kaba la ïoh la ka District lajong naduh u snem 2012 haduh mynta u 2023 kam pat ïoh wat tang ïa ka Traffic Branch hapoh ka District ? Hap ap haduh katno snem ban ioh ïa ka Traffic Branch? Kumno ka Sorkar kam lah ban ai ïa kane ka tnad haba ngi tip shai ba ka East Jaiñtia Hills kadei kawei na ki District ba bun tam ki kali ba ïaid lyngba u surok man ka sngi NH-6 sha kiwei pat ki jylla kata ruh napdeng kine ki ar tylli ki shnong ba khma hakhmat hapoh ka District.
Shuh shuh, balei ka tnat PWD ba dei ban peit ïa kane ka surok Ladrymbai By Pass kam bna eiei ban shna ne maramot ïa kane ka Surok? Ka long hi mo ba ngi kum ki nongshong shnong bad ki nongleit nongwan lyngba kane ka surok bah NH-6 ngin mad ïa kine ki jing eh man ka sngi?
Kum u Nongshong shnong badon ïa ka jingkit khlieh ïa ka bha ka miat hapoh ka imlang sahlang bad ka District, nga da kyntu jur ïa ka Sorkar bad ki tnad ba dei ban peit ïa kine kiei kiei ki jingeh kiba ngi kum ki nongshong shnong ngi tyngkhuh bad mad khnang ban kham suk ïa ki nongleit nongwan kumjuh ruh ïa u paid nongshong shnong jong ka District hi baroh kawei.