Imphal, Jylliew 29: Haduh 1300 ngut ki Longkmie jong ka Jaitbynriew Meitei kiba dei na ki seng bapher bapher kila pynlong ïa ka rally kaba heh bha ban dawa ïa ka jingwanrah da ki bor pahara ka Jylla ha ki Shnong Meitei kiba hab hapoh ka Jiribam District ka Manipur.
Kane ka rally ka la sdang na ïew Jiri Ima bad la pynkut ha Ophis u Deputy Commissioner ka Jiribam District da ka jingaiti ïa ka dorkhas sha u Deputy Commissioner.
Ïa kane ka rally la pynlong da ka Leeching, Jiri, All Jiribam United Clubs Association (AJUCA), Jiribam Development Organization (JDO), World Meetei Council (WMC), Jiribam unit, Apunba Jiri Meira Paibi (AJMP), Jiri Women Association of Kangleipak (JIMWAK), Women Association for Socio-Economic Development (WASED), Jiri Ima Meira Paibi Apunba Lup (JIMPAL), Women Welfare Organization of Kangleipak (WWOK) bad ka Leeching Women wing.
Ki jingkynnoh ki la mih na ki trai shnong ba ki bor pahara ka Sorkar Pdeng khamtam ki shipai Assam Rifles kim shym la ai jingïada ïa ki paid Meitei kiba dei ki trai shnong hynrei ki la bthah pynban ïa ki nongshong shnong ba kin mih na la ki jong ki ïing ki sem.
Ha ka dorkhas, kine ki seng ki la pynpaw ba ka jingdon jong ki bor pahara ka Jylla ba la buh ha Borobekra Sub Division ka long kaba dang tlot palat bad kine ki bor pahara kim lah satia ban ïada ia ki nongshong shnong na ka jingwan hiar thma jong ki kynhun kaikhlaw.
Ki la dawa ruh ban ai jingïarap mar mar ïa baroh ki briew ba la kylla phetwir kiba la sah ha ki relief camp bapher bapher ha Jiribam bad ruh ban ïarap pynshna biang ïa ka ïing jongki, kiba la shah wiang ding.
Kine ki Seng Longkmie kila dawa ban wanrah biang ïa ka jingsuk ha Jiribam bad ban pynsangeh mardor ïa ka policy ban pynïapait ïapra bad ban synshar.
Ha ka 11 tarik Jylliew, ha ka dorkhas ba la phah sha u Myntri Rangbah ka Manipur N Biren Singh, ka Meira Paibis bad ka Club of Chandrapur Ward number 7 bad 8, ka Jiribam kila kynnoh ba ki shipai Assam Rifles kim shym la lah ban ïada ïa ka bha ka miat jong ki paid Meitei ha Jiribam.
