Ngam shym don jingthmu ban ïakhun ïa ka elekshon shiteng samoi, ong u James

0

Shillong, Jylliew 29: U nongïalam ka National People’s Party (NPP) bad u Myntri barim ka sorkar jylla u James K Sangma u la ong ba um don jingthmu ban ïakhun ïa ka elekshon shiteng samoi na Gambegre.
Ha ka jingkren ha ka sngi saitjaiñ, u Sangma u la ong, “Ban pynshai bad ban pynkut noh ïa kane ka kam, nga pynshai ba ngam don jingthmu ban ïakhun ïa ka elekshon shiteng samoi na Gambegre.”
“Hapoh ka jingïalang jong ka party ruh nga la dep ban pynshai kumjuh ïa kane,” u la bynrap.
Ïa kane u James u la kynthoh hadien ba ka la don ka jingkynnoh ba ka don ka jingïapait hapoh ka Party bad kumjuh ruh hapoh ka ïing ka sem ha kaba ïadei bad ka jingai tiket ban ïakhun ïa ka elekshon shiteng samoi napoh Gambegre konstituensi.
U la pynpaw ruh ïa ka jingsngewkhia halor kine ki khubor kiba ïalam bakla.
“Ka long kaba lehraiñ ba ki don ki lad pathai khubor, ha kaba katto katne na ki, ki la don kumba 80 snem ba la ïalam ruh ïa ki nongthoh khubor kiba la rim, ki pynmih ïa kum kine ki khubor shakhmat (front page) bad kumjuh ruh ha ki social media account khlem da ïoh ki jingpynshai bad nangno ki ïoh ïa kine ki tyllong khubor,” ong u James.

Leave A Reply

Your email address will not be published.