Dawa ka SSS Umkiang ban pynïoh ka jingbishar bahok halor ka jingkhlad u samla Kynjaimon Amse

Khliehriat, Nailar, 30: Ka Seng Samla Shnong Umkiang (SSSU), lyngba u President, u bah Ellend Mynthlu, ka pynpaw ka jingsngew khia kaba khraw halor ka jingkhlad kyndit u (L) Kynjainmon Amse, uba dei u nongai buit, nong ai mynsiem ïa ka Seng Samla hapoh shnong, na ka liang ka SSS Umkiang ka daw ba dei ban pynioh ïa ka jingbishar kaba hok halor kane ka jingkhlad noh u bah (L) K.Amse lyngba ka jingthohkit jong ki bor ka aiñ.
Ha kajuh ka por ka Seng Samla Shnong Umkiang ka ai ruh ka jingrshan ba pura ïa ka ejahar ba la buh ha Khliehriat PoliceStation da u kñi jong u (L) Kynjaimon Amse, u bah Lalan Amse, namar katkum ka ejahar ka paw ba na ka liang kiba ha ïing ha sem ki don ka jingsuba bad kiba ha ïing kim lah ban ngeit ne kim lah ban pdiang ba ka jingiap u samla Kynjainmon Amse kan dei na ka daw ka jing aksident kali, namar haba peit ïa ka jinglong jingman ka kali kam shym la don satia kano kano ka dak mong ne dak julor ha ka liang ba shong u (L) Kynjainmon Amse.
Ha u kyrwoh ba la phah da u President Seng Samla Shnong Umkiang, la ong ruh ba “Ka jingkhlad kyndit jong u samla (L) Kynjaimon Amse ka long ka jingduh kaba khraw ym tang ïa ka ïing ka sem hynrei ka long ka jingduh kaba khraw wat ïa ka shnong ka thaw bad ka seng Samla Shnong Umkiang hi baroh kawei”
La bynrap ruh ba ka Seng Samla Shnong Umkiang ka dang khmih lynti ïa shibun ki synñiang na une u samla ban trei na ka bynta ka imlang ka sahlang bad na ka bynta ka District hi baroh kawei, hynrei ha kaba kum kane ka por khlem poi pyrkhat jia ka jingkhlad kyndit, kim don kyntien shuh da kumwei pat, hynrei ki buh tang ha ka jingduwai ba U Trai Nongbuh Nongthaw un wan ban pyntngen ïa ka ïing ka sem bad ïa baroh kiba dang don ka jingiadei bad une u samla.
Lah ban pynkynmaw ba u samla Kynjaimon Amse uba dei u nongtrei mon sngewbha bad nongiasaid Aiñ uba ju kit ïa ka khia ka shon jong ki paidbah ha ka imlang ka sahlang bad ula khlad kyndit ha ka jingjia tyngkhuh kali kaba la jia ha ka step phyrngab jong ka 23 tarik Nailar ha ka shnong Dkhiah, East Jaiñtia Hills District.