Shillong, Nailar, 30: U Symbud Myntri Rangbah uba khmih ïa ka tnat PWD (Roads) u Bah Prestone Tynsong ha ka sngi Thohdieng u la ïathuh ba T. 404.35 klur la mynjur ban pyntreikam na ka bynta 7 tylli ki projek shna surok hapoh ka North East Special Infrastructure Development Scheme (Roads) (NESIDS) ha ki san snem, kata, naduh u snem 2019 haduh 2024.
Na kane, ka pisa ba la pyllait ka long T. 276.88 klur la ïathuh u Bah Tynsong haba ai jubab hapoh ka Ingdorbar Thawaiñ.U la pyntip ba ka jingpyntreikam ïa ki projek ka long na ka bynta 24 bnai naduh ka sngi ba la ai ïa ka FWO. Ka tnat PWD (Roads) ka dei ka pyntreikam ïa kine ki projek.
